SCENA PRIMA

Peppino e Ninetta portando dei dolci, poi Giannattasio, indi Totonno.

PEPPINO: Io nun me fido cchiù dinto a sta casa! Niné quanno fernimmo de j da sotte e da coppe? Io mò scunocchio!

NINETTA: N’atu poco, Peppì, e tutto fernesce, agge pacienza.

GIANNATTASIO: Jammo lesto Peppì. Niné fa priesto ca dinto aspettano li dolce.

NINETTA: Subito. (Via con Peppino.)

GIANNATTASIO: Ah! Che bella giornata, che bella festa, che bella cosa! Ah, questa sera mi son proprio divertito! D. Felice sta dinto tanto cuntento, l’aggio priparato na sorpresa a isso e a figliema dinto a lo giardino, e quanno stanno per coricarsi... allora...

TOTONNO: (Pare c’aggio fatto chesto! Cu tutte le lettere che aggio mannato a D. Felice, chillo pure s’ha spusato. Mò nun aggio proprio che fà cchiù!).

GIANNATTASIO: Totò, D. Felice addò stà?

TOTONNO: Sta dinto a lo giardino nzieme co la figlia vosta.

GIANNATTASIO: Hanno vippeto nu poco, è overo?

TOTONNO: Se capisce.

GIANNATTASIO: Dì la verità, ce l’aggio truvato nu buono partito a figliema?

TOTONNO: Sicuro. D. Felice è un buonissimo giovane, ve l’assicuro io.

GIANNATTASIO: Mò che ora è? Vide tu ca lo mio nun va buono.

TOTONNO: Si lo tenesse!...

GIANNATTASIO: Comme tu nun lo tiene lo rilorgio?

TOTONNO: Io me lo vennette, signò.

GIANNATTASIO: Me dispiace. Ma al primo sgravo di mia figlia, se farà na femmena avrai un orologio d’argento, se poi farà un maschio l’avrai d’oro.

TOTONNO: Bravo! Dunque si è femmena, sarrà argiento, e si è mascolo sarrà d’oro?...

GIANNATTASIO: Si è maschio d’oro.

TOTONNO: (E l’aggio avuto pena pressa! Intanto mò lo matrimonio nun lo pozzo scumbinà cchiù, pecché già se so’ spusate. E meglio ca ce scrivo n’ata lettera a D. Felice per rassicurarlo).