SCENA OTTAVA

Ninetta e detti.

NINETTA (ad Alfredo) Uh! State lloco? Che vulite?

ALFREDO: Stasera vuò venì cu me a Pusilleco?

NINETTA: Cu tutto lo piacere.

FELICE: (E brava la seva!).

ALFREDO: Bravo! Ce vulimmo divertì, sciasciona mia! (Suono di campanelli d. d.)

NINETTA: Uh! So’ chiammata, dateme lo permesso.

ALFREDO: Io stasera te vengo a piglià?

NINETTA: Va bene. (Via.)

ALFREDO: D. Felì scusate.

FELICE: No, niente. (Azione.) Nun sapite niente? Vuje avite baciato la mano a Ninetta? Embè m’è venuto lo gulio.

ALFREDO: De che?

FELICE: De me vasà a muglierema! (Via.)

ALFREDO: Ah! ah! (Ridendo va via.)