SCENA OTTAVA

Michele, poi Rosina, indi Felice e detti.

MICHELE: Uh! Vuje state ccà? Bravo!

ALONZO: Addò sta lo zio vuosto?

MICHELE: Quà zio, chillo nun m’è niente, aggio ditto accussì pe pazzià.

ALONZO: Chiammatelo, chiammatelo.

MICHELE: Ma vuje mò che vulite fà, lo vulite vattere, lo vulite sciaccà, lo vulite accidere? E che ne ricavate? Facite nu chiasso, nu scandalo, dimane tutta Torre de lo Grieco, e Torre Annunziata saparranno lo fatto, e facite sta bella figura, addò jate a mettere le facce?... Invece vuje le potite fà na cosa, le potite dà nu castigo buono, e ve facite pure quatte rise.

CANDIDA: Niente, ha d’avè na bona mazziata!

MICHELE: Ma che mazziata e mazziata, che l’avite pigliato pe na criatura? E pò quanno lo vulite sapé, nce avite colpa vuje a farle fà tanta scemità!

CANDIDA: Io?

MICHELE: Sicuro! Pecché vuje nun le date pace, vuje l’annummenate sempe la bon’anema de D. Cesarino Sanguetta, nun se fidava cchiù de lo sentere, e perciò se trova dinto a sti mbruoglie! Facite chello che ve dico io.

CICCIO: Ma che vulite fà?

MICHELE: Zitto, sento rummore, sarrà isso. Venite cu mmico, aggio fatta na bella pensata.

ROSINA (uscendo): Ched’è tutta sta gente?

MICHELE: Justo, justo, venite vuje pure.

ROSINA: Addò?

MICHELE: Dinto a sta cammera, mò ve dico chello che voglio fà. Isso nun ha da sapé ancora che vuje state ccà; nun dì niente sà. (A Salv.)

SALVATORE: Va bene.

MICHELE: Jammo, venite, vulimmo ridere veramente de core.

TUTTI: Ma...

MICHELE: Venite, venite. (Tutti viano a sinistra meno Salv.)

SALVATORE: Vì che piezzo d’assassino, chillo era nzurato e veneva a fà la commedia co la figlia de lo princepale.

FELICE (d.d. dando la voce delle fragole): Fravola fresche, fravola frà...

SALVATORE Seh, dà la voce de li fravole tu, ca mò vide che belli nespole che pruove!

FELICE (uscendo): Fravole a 6 solde a lo quarto, fravola frà... Tu che faje lloco?

SALVATORE: Niente, sto aspettanno a buje pe purtà ntavola.

FELICE: E ghjamme, che tengo na famma che me la veco cu l’uocchie.

SALVATORE: Ogge, D. Felì, facite nu bello pranzo?

FELICE: Lo ssaccio. Ove nce ne stanno dinto a la cucina?

SALVATORE: Uh! Avite voglia.

FELICE: Sà che haje da fà, Salvatò, fammene truvà dudece sbattute, e famme truvà nu poco de petrosino tritato fino fino.

SALVATORE: Va bene.

FELICE: La tiella pronta, e nzogna assai.

SALVATORE: Non dubitate. (Eh! Mò faje marenna!). (Via a destra.)

FELICE: Nun saccio si è stato lo sole, o è sta malattia all’uocchie, ma io me sento co la capa stunata... pare comme m’avesse pigliato lo chinino. Io aggio addimmannà a quaccheduno che dice sotto a sta lettera, è possibile che D. Ignazio diceva sti parole a D. Alonzo, nun pò essere, ha da dicere n’ata cosa.