SCENA NONA

Concetta, poi Michele, Alonzo, Rosina e detto.

CONCETTA: D. Felì, addò site stato?

FELICE: Dinto a lo ciardino, aggio cugliute quatte fravole.

CONCETTA: Bravo, avite fatto buono.

FELICE: Aggio fatto buono, sì, ma me so’ spurcato tutte li mmane, permettete che me le vaco a lavà?

CONCETTA: Jate, e facite ambressa pecché avimma mangià. Anze, dicite a Salvatore che portasse a tavola.

FELICE: Subito. (Via a destra.)

CONCETTA: Ma vedite che faccia de cuorno. (Alla porta a sinistra.) Venite, venite.

MICHELE: Ve raccomanno, non facite rummore, e buje nun ve tradite. (Escono Alonzo e Rosina.)

ALONZO: Addò sta? Addò sta?

CONCETTA: S’è ghiuto a lavà li mmane, pecché le teneva sporche de fravole.

ALONZO: Vì che piezzo de svergognato!

ROSINA: (Ah! Cielo mio, te ringrazio!).

MICHELE: Ricordateve buono chello ch’avimmo combinato. Assettateve a tavola. (Tutti vanno a sedere a tavola, Felice al centro, alla sua destra Concetta, poi Michele, alla sinistra Rosina, poi Alonzo.) Zitto eccolo ccà.

FELICE: Ah, bravo, state  a tavola, e che facite, nun mangiate?

ALONZO: Ah, chesto no, aspettaveme a te.

FELICE: E io che ne sapeva... eccomi qua... sono pronto. Che magnifico presutto, papà, chesto l’avite pigliato vuje?

ALONZO: Sì, figlio mio.

FELICE: E bravo papà. Io per esempio, si avesse accattà lo presutto, lo pigliarrìa malamente, pecché nun me ne rentenne.

CONCETTA: E se capisce. (Tutti mangiano.)

MICHELE: D. Alonzo se ne rentenne nun sulo de lo presutto buono ma de tutte cose. Tenette l’abilità de se scegliere chesta mugliera, bella, bona, e di cuore.

CONCETTA: Grazie, è bonta vosta.

FELICE: Pe riguardo a la mugliera pò, io pure me ne rentenno, e credo ch’avesse saputo scegliere.

MICHELE: Oh, questo è certo.

ALONZO: No, lo zio vuosto pe sti fatte ccà sceglie buono! Approposito, la frittata quanno la jate a fà?

FELICE: Quanno vulite vuje.

ALONZO: Subeto, ha da essere lo primmo piatto.

CONCETTA: Sì, sì, la vulimmo mò.

FELICE: La vulite mò? E io mò ve servo. Cinche minute de tiempo, permettete? (Via a destra.)

MICHELE (s’alza in fretta e va alla porta a sinistra): Susiteve. A buje, venite.... zitto, zitto.