SCENA ULTIMA

FELICE (con la fronte avvolta in una salvietta): Pare che lo friddo m’ha fatto bene, me sento nu poco meglio. Eccomi qua. (Siede e guarda intorno.)

ALONZO: Addò si stato neh Felì?

CONCETTA: Pecché ve site susuto da la tavola?

FELICE: No, niente, tengo nu poco de dulore de cape, e me so’ ghiuto a mettere stu salviette bagnato nfronte.

ALONZO: Ah, sicuro, pe lo dulore de capa, lo frisco fa bene. Basta, saje che sta frittata è na cosa troppo scicca?

CONCETTA: Io però, ne vularrìa n’atu ppoco pecché m’è piaciuta.

ALONZO: Dancello, Felì, che saccio, me pare nu scemo ogge.

FELICE: E avite bisogne de me? Serviteve. (Io starraggio ascenno pazzo, chesto che cos’è, ma songh’io, o nun songh’io!).

CONCETTA: Rusì, mange, vide comme è saporita.

ROSINA: E che bell’addore che mena.

MICHELE: Io ve l’aggio ditto zi zio fa belli frittate! (Cand. esce piano piano dritta come una statua. Si situa dietro Mich.)

ALONZO: Ma stu dulore de capa, comme t’è venuto? Tu poco primme nun lo tenive?

FELICE: E che saccio, forse cogliendo le fravule, lo sole era nu poco cucente, siccome non abituato... pò me so’ miso vicino a lo fuoco a fà la frittata... ma appena m’aggio miso stu salvietto nfuso nfronte, subeto me so’ ntise meglio... mò me sento soltanto nu poco stunato... nu poco la capa pesante. (Dicendo queste parole ha fissato lo sguardo su Cand.) Eh, llà mò nun se tratta de vedé na cosa pe n’ata, llà veco na cosa de cchiù... nun se move... e che pò essere? (Prende il sifone dell’acqua di Seltz e lo scarica addosso a Cand.)

CANDIDA: Ah! Puozze sculà, m’ha nfuse tutta quanta! Assassino! Birbante!

LUISELLA (uscendo): Scellerato!

CICCIO (uscendo): Bifolco!

ALONZO: Ire venuta a ruvinà la casa mia!

CONCETTA: A ruvinà sta povera figliola! (Esce Sal. ed Err.)

FELICE: Michelì, chisto è servizio che m’haje fatto tu!

MICHELE: No, ve l’ha fatto lo curzè, che D.ª Candida truvaje dinto a la balice!

CANDIDA: Mbruglione, svergognato!

ALONZO: Permettete nu mumento!

CONCETTA: Alò, pe carità!

ROSINA: Papà, che vulite fà?

ALONZO: Niente. (Fa per domandare qualcosa, si morde un dito, poi si gratta la testa, e poi dice:) Va buono, vattenne.

CICCIO: Con permesso, scusate... (Per inveire.)

LUISELLA: Papà...

CANDIDA: Che buò fà mò?

CICCIO: Signore... la vostra condotta è indegna di un galantuomo, voi non potete più stare nella mia famiglia!

FELICE Si capisce, e nun nce vengo cchiù! Pecché pe causa vosta me so’ truvato dinto a tutti sti guaje! Mi avete fatto odiare la casa! E D. Cesarino Sanguetta, e D. Cesarino Sanguetta, nun me ne fidava cchiù!... Si muglierema me vò perdonà e vò sta sulo cu mmico, io giuro che non me move cchiù da vicino a essa, e nun la faccio piglia cchiù collera.

CICCIO: Figlia mia, che buò fà?

LUISELLA Va bene... jammoncenna a casa.

FELICE: Oh! Moglie mia! (L’abbraccia.)

MICHELE: E io?

FELICE: Tu si nun te ne vaje, te faccio na cauciata, che te la ricuorde fino a che muore!

ALONZO: Intanto sta povera guagliona, steva tanto allegra pecché spusava, mò tutto nzieme nun sposa cchiù.

MICHELE: Si mi credete degno di vostra figlia?

ERRICO (afferrandolo per una recchia si fa avanti): Levete da lloco. D. Alò, io faccio l’ammore cu Rusenella da duje anne, facitemella spusà!

ALONZO: Tu Errico?

ROSINA: Si, papà, nce vulimmo tanto bene.

ALONZO: Bravo! E io nun ne sapeva niente!

ERRICO: M’aggio mise sempe paura de ve lo dicere, pecché...

ALONZO: Nun tiene niente, lo ssaccio, ma nun mporta, si nu buono giovene, te conosco... e acconsento a stu matrimonio.

ROSINA: Oh, che piacere!

FELICE: Vedete che li mbroglie meje hanno portato dei serii vantaggi. Aggio fatto tre cose bone. Aggio contentata la figlia vosta, me so’ diviso da D.ª Candida, e ho divertito questo rispettabile pubblico!

(Cala la tela.)

Fine dell’atto terzo

Fine della commedia