SCENA TERZA

Lucia e Rosina, poi Errico.

ROSINA: Ah! Che nottata, che nottata! Nun aggio potuto chiudere n’uocchio.

LUCIA: Io invece aggio dormito saporitamente. (Entrambe dalla sin.)

ROSINA: Tu la pienze de na manera che io nun capisco, comme, mariteto va a lo veglione, e tu te ne staje sciolta sciolta.

LUCIA: Ma che buò che faccio, poteva essere peggio, certamente che maritemo è stato cu te, Feliciello è stato cu me, dunque?

ROSINA: Già, pecché ereme nuje, pecché simme state nuje che l’avimmo mannato le lettere, loro però, nun ne sanno niente, loro nce so’ ghiute cu piacere, nce so’ ghiute pe truvà ati femmene, capisce, ati femmene.

LUCIA: E che fa, si erano ati femmene, se li magnavano, avarriano cenato lloro, invece avimmo cenato nuje, forse avarriano ballate, se sarriano fatto quattro cerimonie, ma pò pure la nuttata passava, e li marite ccà turnavano.

ROSINA: E si, tante grazie... no, agge pacienza. Lucia mia, stu penzà tujo nun me piace, parlanno accussì, me faje capì che a mariteto nun lo vuò bene.

LUCIA: No, anzi io lo voglio troppo bene, ma nun faccio che faje tu, pecché so’ convinta che tutti li marite, chi cchiù, chi meno, hanna fà chesto, e nuje nun nce avimma piglià collera.

ERRICO (dal fondo): (Nun l’aggio potuto truvà). Ah! Voi state qua.

LUCIA: Stiamo qua.

ERRICO: Vi siete svegliate un poco tarde stammatina?

LUCIA: Sì, abbiamo dormito più degli altri giorni.

ERRICO: Bravissimo.

LUCIA: Tutt’o cuntrario de vuje, vuje avite dormito poco.

ERRICO: No, t’inganni, aggio durmuto quant’avite dormite vuje.

ROSINA: Oh! Chesto nun po’ essere, vuje ve site ritirate a li 5 e meze.

ERRICO: Uh! Scusate, e vuje comme lo sapite? Si stiveve durmenno?

ROSINA: Me so’ scetata pecché aggio ntiso la tuzzoliata vosta.

ERRICO: Perdonate, pecché chesto manco pò essere, pecché io tengo lo chiavino de lo palazzo, e lo chiavino de la porta, forse sarrà stata quacch’ata tuzzuliata.