SCENA QUINTA

Marietta, e detti, poi Concetta e ragazzo con scatolo di cappello.

MARIETTA: Signò è venuto...

ALESSIO: Mio figlio?

MARIETTA: Nonsignore, la modista.

ANGELAROSA: Falla trasì. (Marietta via.)

ALESSIO: Io me vaco a cagnà la cammisa. (A Giuseppina:) Figlia mia, non sentì chiacchiere, quando avrai visto mio figlio, e non lo trovi di tuo genio, mi dirai quello che vuoi tu. Mio figlio miope, chillo jetteme na vota ncoppa S. Eramo, isso s’affacciaje, e me dicette: Papà, guardate, no purpo a mmare! (Via a sinistra.)

MARIETTA: Trase trase Concettè, ccà sta la signora.

CONCETTA: Serva vosta. (Al ragazzo:) posa ccà lo scatolo, e aspetteme fore. (Ragazzo via.)

ANGELAROSA: Finalmente vi siete degnata di venire?

CONCETTA: Scusate signora mia, ma na combinazione...

MARIETTA: Ma tu tiene l’uocchie comme avisse chiagnuto...

GIUSEPPINA: V’è successa qualche disgrazia?

CONCETTA: Sissignore, na disgrazia.

MARIETTA: Uh! e comme?

CONCETTA: (Po’ te conto). Signò, volite vedé lo cappiello?

TIMOTEO: Sì, sì, vedimmo sto cappiello. (Concetto lo caccia dallo scatolo.)

GIUSEPPINA (osservandolo): Bello!

TIMOTEO: Veramente scicco, non è overo, D.^a Angelarò?

ANGELAROSA: è grazioso, D. Timò.

CONCETTA: Signori, volite vedé come ve va?

GIUSEPPINA: Sì, sì. (Se lo mette.)

CONCETTA: Ve sta proprio n’amore.

MARIETTA: Overo parite bella, signori.

TIMOTEO: Chesta è l’ultima moda?

CONCETTA: Gnorsì.

TIMOTEO: Me pare na carta senapata quanno s’arriccia.

GIUSEPPINA (si osserva allo specchio): Sì, me sta buono nfaccia. Resta d’assodare de quà colore s’ha da mettere lo fiore.

CONCETTA: A piacere vuosto, comme me dicisteve, ve n’aggio portato duje, uno bianco e l’auto rosa, chillo che cchiù ve piace nce metto.

GIUSEPPINA: Comme ve pare neh, mammà?

ANGELAROSA: Miettancello bianco, accossì lo portava pure io, quanno facette la primma asciuta appoggiata a lo vraccio de sto birbantiello.

TIMOTEO: (Dalle dà).

ANGELAROSA Ti ricordi quei magnifici fiori d’arancio che scendevano da questo lato?

TIMOTEO: Si me ricordo i fiori d’arancio? io me ricorde pure chillo mellone de pane che scenneva da chesta auta parte.

ANGELAROSA: E non te ne vuò j lazzariè, pazzea sempe. (Lo carezza.)

TIMOTEO: (Puozze passà no guaio, sta caudara de patane sfatte!).

ANGELAROSA: Mettitencello bianco.

CONCETTA: Va bene. Allora permettete. (Siede e lavora.)

ANGELAROSA: Fate liberamente, anze pe non darve suggezione, ve lassammo sola. Viene Giuseppì. D. Timò damme lo braccio.

TIMOTEO: Eccolo ccà. (Angelarosa si appoggia con abbandono.) (Mò parte lo treno merci.) (Viano.)

CONCETTA (lavorando sospira): Ah!

MARIETTA: Concettè, che bonora t’è succiesso?

CONCETTA: Lasseme sta Mariella mia: aggio appaura d’avé dato no passo che me costarrà lagreme assaje, e fuorze fuorze me farrà essere accisa da frateme.

MARIETTA: Tu che dice bene mio, e che haje fatto?

CONCETTA: Haje da sapé che da duje anne faccio l’amore co no giovene.

MARIETTA: E che fa, l’ammore non è delitto.

CONCETTA: No, ma io le so’ mogliera.

MARIETTA: Mogliera!

CONCETTA: Già, sposata sulamente a la Chiesa.

MARIETTA: E mammeta lo ssape?

CONCETTA: Lo ssape; frateme no, perché durante lo tiempo che isso è stato a fà lo soldato, e che io vedette chillo... Ah! non l’avesse maje visto.

MARIETTA: Ma pecché non dice lo tutto, e sposate pure allo Municipio?

CONCETTA: E comme po’ essere, se chillo non tene né cielo da vedé, né terra da scarpesà.

MARIETTA: Pure chesto.

CONCETTA: E sarria niente... ma io credo...

MARIETTA: Che cosa?

CONCETTA: Che chillo sbrevognato s’è pigliato spasso de me, che m’ha nagannata, che m’ha tradita... ma si è overo, mare a isso, pecché io sarria capace de qualunque cosa... ma non credo che potesse scordarse ce me e de lo figlio sujo.

MARIETTA: Figlio!

CONCETTA: No, Felice Sciosciammocca è giovene d’annore, e de parola.

MARIETTA: Felice Sciosciammocca!

CONCETTA Chesto è lo nomme sujo.

MARIETTA: Uh! Poverella a te!

CONCETTA: Pecché?

MARIETTA: Pecché chillo che tu cride no giovene de parola, e d’annore, è n’assassino, no sbrevognato, isso te nganna, te tradisce.

CONCETTA: Mariè, tu che dice! P’ammore de lo Cielo, non me fa venì na cosa.

MARIETTA: Ma si, Felice Sciosciammocca s’aspette ccà a momente, pe essere presentato a la figlia de la patrona mia la quale l’ha da essere mogliera.

CONCETTA: Mogliera! Ma tu pazzie?

MARIETTA: Te lo giuro.

CONCETTA: Mogliera! Felice tradirme... isso!... Ah! Mò capisco pecché stammatina s’è finto malato pe non venì co me lo sforcato, aveva da venì ccà, pe essere presentato a chella che... lo voglio fà nzurà io co no punio ncoppa all’acchiare, che ha da essere na meraviglia!