SCENA SETTIMA

Ersilia e detti, poi Felice, indi Vicenzino e Concetta.

ERSILIA: Dinto tutto è pronto pe la cena, ah, ah. (Ride.) Caro D. Alessio, caro D. Timoteo.

ALESSIO: E sto ridere che c’entra?

TIMOTEO: Mò nce cuffiate appriesso?

ERSILIA: Perché lo maritate, caro marito di D. Angelarosa.

ALESSIO: Levate da sotto!

ERSILIA: Saccio tutto! E ringrazia lo Cielo come t’è benuto.

TIMOTEO: Permettete me ne vado. (p.a.)

ERSILIA: Addò jate? (Lo trattiene.)

TIMOTEO: Me ne vaco.

ALESSIO: No, haje da sta ccà. (Isso se ne jeva, e me voleva rimanè a me mmiezo a lo mbruoglio!)

ERSILIA: No, avite da restà, avite da mangià primme, po dico tutte cose a Vicenzino, chillo v’ha da palià.

TIMOTEO: Doppo magnato nce dà no bicchiere de marsala.

ALESSIO: Nce vò lo digestivo.

FELICE (esce): Vorria sapé se zi Timoteo... (S’imbatte con Timoteo.) (Mbomma!)

TIMOTEO: Ah! Mariunciello, posa le 6000 lire!

ALESSIO: Feliciello!

FELICE: Io so’ D. Mauriello de Casoria.

TIMOTEO: Si lo cancaro che te roseca! Posa li 6000 lire!

ALESSIO: Quà 6000 lire?

TIMOTEO: Tu non saje niente, quanno te ne sì ghiuto, chisto birbante...

VINCENZINO (con ragazzo in fasce avvolto in un fazzolettone): Eccoce ccà. (A Timoteo.) Feliciè teccote a fighieto.

FELICE: (Figliemo!)

VINCENZINO: D. Mauriè, levateve da miezo. A tavola lo piccerillo farà cchiù contento la mamma e lo padre. (Ad Alessio:) Compà datelo no vaso. (Felice si mette tra i due.) D. Mauriè ve volite levà o no?

ALESSIO: (E chi ne capisce niente). (Bacia il ragazzo.)

VINCENZINO: Mò a lo padre. (Consegna il ragazzo a Timoteo.)

ALESSIO: (Timoteo è lo padre!)

TIMOTEO: (Chisto che mbruoghio è). (Concetta si mostra confusa, Ersilia ride.)

ERSILIA: Dunque andiamo tutti a tavola!

VINCENZINO: A tavola!