SCENA PRIMA

Peppeniello, seduto vicino alla finestra e Popa dalla porta in fondo con granata.

PEPPENIELLO (facendo segni dirimpetto): Ajersera? Arrivaje fino a Toledo e pò me tornaje... Comme? Me jette a coccà... Non è lo vero? Pozza morì de subeto si dico na buscia.

POPA: (Gué, chisto stà ccà). Neh, D. Peppenié...

PEPPENIELLO (non badandole): E pecché? Non signora, non voglio, le dice che non te fide.

POPA: D. Peppenié...

PEPPENIELLO (c.s.): E a te che ne preme?... Io pure non aggio abbuscato tanta vote pe causa toja? No, non voglio che nce vaje. Statte bona.

POPA: D. Peppenié...

PEPPENIELLO: Chi è? Uh! D.^a Pò, site vuje...

POPA: Songo io. Voglio sapè a vuje chi v’ha aperta la porta?

PEPPENIELLO: L’aggio scassata, e songo trasuto.

POPA: E D. Felice e Pulicenella?

PEPPENIELLO: Non l’aggio trovate. Fuorze non se saranno ritirate stanotte.

POPA: Io l’aggio ditto che chille so’ duje vagabunne; ma si pe la fine de lo mese non me danno tutto chello che avanzo; ne li caccio da la casa.

PEPPENIELLO: No, pe carità! Io l’aggio ditto: no juorno de chisto me piglio miezo litro de scisto e accossì moro e felicenotte.

POPA: Vuje che dicite...

PEPPENIELLO: D.^a Popa mia, pe carità non voglia maje lo cielo... Io profittanno de sta fenesta de D. Felice che corrisponne derimpetto a la fenesta de Peppenella, nce parlo no poco. Io me sacrifico, me stongo senza marenna pe stà ccà.

POPA: E pecché?

PEPPENIELLO Pecché papà me dà sei solde a lo juorno pe la marenna, e io li dongo a D. Felice, che me dà lo pizzo e la seggia pe m’assettà; si vuje ne cacciate da isso, io comme faccio, io so’ rovinato, me mettite nella dura condizione che m’accatto miezo litro de scisto...

POPA: E ve lo bevite? Va bene, non avite appaura, non li caccio, ma basta che pavano.

PEPPENIELLO: Non dubitate, ve faccio pagà io. Pe mò lassatemene ire, che si papà se sceta e s’addona che so’ asciuto da la casa, na vertolina non me la leva manco Barbanera. (Via.)

POPA: Povero guaglione, me fa proprio compassione.