SCENA TERZA

Rienzo, Feliciello e Pulcinella.

RIENZO: Trasite. Assettateve ccà, pecché lo patrone sta abbascio a lo giardino nzieme co n’amico sujo.

FELICIELLO: Noi aspettiamo, non abbiamo che fare, abbiamo pure mangiato.

PULCINELLA: Si, abbiamo mangiato certi maccheroni...

FELICIELLO: (Zitto, per carità...).

RIENZO: Allora tanto meglio, assettateve e aspettate. Dateme lo permesso. (Via.)

FELICIELLO: Addio. Dunque mò avimmo da mettere mano a lo 2° atto; pecché lo primmo è bello che fatto. Dinto a lo 1° atto io nce metto tutte le scene che so’ succiese. Vide si te persuade. Faccio alzare la tela co la casa di D. Felice, che sò io...

PULCINELLA: Nzomma, vuò fa chello che nc’è succieso a nuje... Pure l’affare de li maccarune? E lo 2° atto?...

FELICIELLO: E mò, si non siente. Chillo tale che è venuto co la figlia a cercarme la commedia, io nce lo metto pure e faccio camminare l’argomento ncoppa a no viecchio che ha voluto essere scritto na commedia per farla rappresentà a lo teatrino sujo in casa, e dietro chello che m’ha ditto, che D. Anastasia non vò dà la figlia a lo figlio de D. Asdrubale, pecché se lo volarria sposà essa, io mò principio lo 2° atto co la spiegazione amorosa che fa la vecchia a lo guaglione.

PULCINELLA: Seh! Va buono; e io mettarria che lo guaglione dicesse che no.

FELICIELLO: Seh! Me persuade. (Va a scrivere con Pulcinella.) Atto 2° Scena 2°...

PULCINELLA: E la scena 1^a?

FELICIELLO: Saje, sempe de prima scena songo servitore, auta gente inutile, diceno quatto chiacchiere, e se ne vanno.

PULCINELLA (scrivendo): Scena 1^a Gente inutile...

FELICIELLO (c.s.): “Scena 2^a Spiegazione amorosa della vecchia col ragazzo il quale la rifiuta, la vecchia arrabbiata va via a sinistra ed il ragazzo via a destra. Scena 3^a: D. Felice e Pulcinella accompagnati da un servo vengono in iscena...”. Oh! Mò tutto chello che succede dinto a sta cammera o a qualche auto pizzo de sta casa nce l’avimmo da signà per indi estenderlo e metterlo in iscritto. Non te fa sfuggì niente sa...

PULCINELLA: Non nce pensà.

FELICIELLO: Pensa che se tratta de 200 franche...

PULCINELLA: Dei quali 100 so’ robba mia.