SCENA ULTIMA

 

D. Raffaele, poi tutti gli attori secondo l’ordine della scena, Ninetta, Pulcinella, Felice, ecc.

 

RAFFAELE: Che è succiesso?

ANASTASIA: Sti birbante... Lassateme...

ASDRUBALE: Allegramente! Stasera vene lo notaro... Che d’è st’ammoina?

ANASTASIA: D. Asdrubale mio, simme state tradite, simme state ngannate. Lo figlio vuosto ha ngannato a me, e figliema ha ngannato a vuje.

ASDRUBALE: Comme sarrìa a dicere?

ANASTASIA: Sarria a dicere, che l’aggio trovato parlanno a tutte’e duje, e aggio ntiso co le rrecchie meje che nce hanno cuffiate, che l’hanno fatto per farse le dispettielle nfra de loro.

FELICIELLO (scrive sulla gamba): Bene.

ASDRUBALE: Io aggio combinato tutto pe me sposà a Peppenella.

PULCINELLA: E che fa, scombinate n’autra vota.

ASDRUBALE: Neh, non pazziate... Ma comme, tu m’haje ditto?

PEPPENELLA: V’aveva ditto che ve voleva sposà pe vendecarme de chello che m’aveva fatto Peppeniello.

ANASTASIA: E tu?...

PEPPENIELLO: Io v’aggio ditto che ve voleva sposà pe fa sentere corrivo a Peppenella, credennome chello che m’aviveve ditto vuje, cioè che faceva l’ammore co no soldato.

RAFFAELE: (Io mò crepo da la risa!... D. Felì, vuje ve state signanno tutte cose?).

FELICIELLO: (Tutto non dubitate).

ANSELMO: Chille dinto... Ah! v’aggio ncucciato finalmente.

PULCINELLA: (Uh! D. Anselmo...).

FELICIELLO (ad Anselmo): (Stateve zitto, mò non è momento de pensà a chesto. Aspettate che mò ve servo).

ANSELMO: (Io non me movo da ccà).

ASDRUBALE: Ah, tutto chesto nce sta? Ebbene, esci da la casa mia non ti conosco per figlio.

PEPPENIELLO: Papà. (Piange.)

ANASTASIA: E a te dimane te vaco a chiudere dinto a no monastero.

PEPPENELLA: Mammà...

ANASTASIA: Niente, non nc’è remissione.

ASDRUBALE: Esci mò proprio.

PEPPENIELLO: Papà, e io addò vaco?

ASDRUBALE: Mmiezo a la strada...

PULCINELLA: Eh, eh, D. Asdrù, ma che sì ghiuto mpazzia! Comme! Se mette no figlio miezo a na via, pecché sto figlio vò chella che tu te volarrisse piglià... Miettatenne scuorno, ncondate che si viecchio, si dimane s’appure sto fatto che se diciarrà de te?... E vuje pò D. Anastasia, a chesta età ancora pensate de mmaritarve, e pigliarve a chi pò? A no guaglione, sapenno che sto guaglione fa l’ammore co la figlia vosta? Mettitevenne scuorno!... La vecchia s’ha da sposà lo viecchio, e lo giovene co lo giovene. Spusateve vuje duje, e giacché li guagliune se vonno accossì bene, facitele spusà pure a loro, e felicenotte.

PEPPENIELLO: Papà mio caro caro.

PEPPENELLA: Mammà mia bella bella...

FELICIELLO: D. Asdrù, contentatele.

PULCINELLA: Fatelo per me.

ASDRUBALE: D. Anastasì, che ne dicite?

ANASTASIA: E io che saccio.

ASDRUBALE: Volimmo fa sti duje matremmonie?

ANASTASIA: Sapite che è, vuje site viecchio.

ASDRUBALE: E vuje sarrate quacche autra cosa.

ANASTASIA: Che aggio da fa, m’arremedio... Chesta è la mano.

ASDRUBALE: E chesta è la mia.

PEPPENELLA: E nuje?

PEPPENIELLO: Che avimmo da fa?

ASDRUBALE: Spusate, e lo Cielo ve benedica!

PEPPENIELLO: Ah, finalmente Peppenella è la mia.

RAFFAELE: Bravo, mò sì che te voglio cchiù bene de primma; mò sì che mi sei veramente amico! Tu chill’unico figlio tenive, vuje sulo chella figlia teniveve. è stato buono che l’avite fatte contente. Che non faccio io pe sta figlia pe contentarla, tutto chello che vò le dongo... M’addonaje che a D. Vincenzino non lo voleva, e subito l’aggio licenziato. Trattandosi di matrimonio, essa se l’ha da scegliere, pare che accossì doppo non have co chi se la piglià.

MARIETTA: A proposito de chesto, io lo marito me l’aggio trovato.

RAFFAELE: Te l’hale trovato? (In tuono serio.)

FELICIELLO: (Ah! Comme è ntroppecuso lo finale de sta commedia).

MARIETTA: Sì, me l’aggio trovato, me piace e me lo voglio spusà.

RAFFAELE: E chi è?

MARIETTA: Eccolo ccà, D. Felice.

RAFFAELE: Voi?

FELICIELLO: Io, sissignone, e se me fate sposà la figlia vosta ve giuro che ve scrivo quanta commedie volite vuje.

RAFFAELE: Tu veramente dice? Lo vuò bene?

MARIETTA: Sì, papà.

RAFFAELE: Embé, quanno lo vuò bene... è no buono giovene, è de talento, sposatillo e bona sera.

FELICIELLO: Chesta è la mano.

MARIETTA: E chesta è la mia.

RAFFAELE: (Sto matrimmonio pure nce lo mettite dinto a la commedia?).

FELICIELLO: (Se sa benissimo, chesto è lo meglio).

NINETTA: Signori, mmiezo a tanta matremmonie ve faccio a sapè che nce sta pure lo mio co D. Pulecenella, che aggio parlato co la signorina.

ANASTASIA: Sto matrimonio non me dispiace.

ANSELMO: Neh, non ve scordate de lo sonetto?

RAFFAELE (a Felice): Che sonetto vò chisto?

FELICIELLO: (No sonetto che vò essere fatto pe lo nomme de la mogliera... Chisto pure nce l’aggio miso dinto a la commeia). Aspettate, che mò ve lo faccio.

RIENZO: Signori, a tavola.

RAFFAELE: La commedia l’avete abbozzata tutta quanta?

ASDRUBALE: Quale commedia?

RAFFAELE: Niente, è na commedia che D. Felice ha scritto pe lo teatrino mio.

ASDRUBALE: E qual è l’argomento?

PULCINELLA: Non ve ne incaricate, è meglio che non lo sapite.

FELICIELLO: Tutta, tutta perfettamente: non nce manca che lo finale, e ne ho immaginato uno proprio magnifico; ma quello ci ha chiamato in tavola, andiamo a mangiare.

RAFFAELE: No, lo finale lo voglio sentì...

TUTTI: Sì, lo volimmo sentì...

FELICIELLO: (Oh, cancaro justo mò). Pulicené, andiamo, improvvisiamo no finale... Mò accommencio io...

Finita è la commedia,

Non c’è più niente a fare...

PULCINELLA: Finita è la commedia.

Non c’è più niente a fare...

FELICIELLO: (Haje ditto chello che aggio ditto io!).

Pubblico rispettabile,

Vi prego a perdonare...

PULCINELLA: Pe famma la screvetteme...

FELICIELLO Per fama, per onore,

E ci costò, credetemi,

Grandissimo sudore.

E si v’ha fatto ridere...

Allor contento sono.

PULCINELLA: E non cercammo applause,

Ma schitto no perduono.

 

(Tutti ridono mentre cala la tela.)

 

Fine dell’atto terzo

 

FINE DELLA COMMEDIA