SCENA SECONDA

Mimì e detti.

MIMÌ (d.d. prima a destra): Va bene, ho capito, n. 39.

NICOLINO: Chi è?

LISA: La voce di Mimì.

MIMÌ: Addò sta Lisetta mia, ah! Eccola qua.

LISA: D. Mimì e vuje che ghiate facenno pe coppa a sto albergo?

MIMÌ: Mò te conto. Primma è tutto, damme n’abbraccio sciasciuncella mia.

NICOLINO (che ha visto, cade su se stesso): Ah!

MIMÌ: Mamma mia, chisto mò more, chi è?

LISA: È lo direttore dell’albergo che soffre dei capogiri. (A  lui:) Che ve sentite?

NICOLINO: E io ve ho pregato, io non posso avere emozioni, vuje v’avite fatto abbraccià e io...

MIMÌ: (È muorto de subbeto). E ghiatevenne allora.

NICOLINO: Sicuro, vado via, e si no io moro. Ah! (Sospira.) Che bella cosa, abbracciare una canzonettista. Ah! (Via.)

MIMÌ: Che ato bello tipo ca è chillo!

LISA: Dunque se pò sapé che site venuto a fà ccà.

MIMÌ: Ecco qua: siccome paricchie amice avimmo organizzato na cenetta a lo scoglio de Frisio, purtammo ognuno la nnammurata soja, accussì te so’ venuto a piglià all’Eden, ma llà aggio saputo ca tu stasera non cantave, e so’ venuto ccà. Tu mò te miette lo cappiello e nce ne jammo. Vulimmo fà cose de pazze. (Abbraccia.)