SCENA TREDICESIMA

Teresina, Felice e detti, poi Nicolino, Ciccillo e Marietta.

TERESINA (seguita da Ciccillo dalla prima a sinistra): E chi so’ chille?

SAVERIO: Chi è lloco?

FELICE: Nun è isso, trasite. (Rientrano e chiudono.)

SAVERIO: E chi so’ chille ca so’ trasute ccà dinto? (Va guardando.)

NICOLINO: (uscendo con Ciccillo e Marietta): Neh, mio signò, e che maniera è questa di suonare?

MARIETTA: Accussì facite scetà tutte li passaggiere. E poi che fate qui? Questa non è la vostra camera.

SAVERIO: Vuje che ne state vuttanno? Chi sta sunanno?

CICCILLO: Proprio vuje e siete pregato di smettere.

SAVERIO: Ma sentite, cheste so’ cose de pazze, diciteme cu che sto sunanno?

NICOLINO: Col campanello, non lo sentite?

SAVERIO: Lo sento, ma non è ccà.

NICOLINO: È proprio dentro a questa camera.

ROSINA: Savè ch’è stato? (Resta nel letto.)

SAVERIO: Ma cheste so’ cose nove, io non tengo nisciuno campaniello, comme vulite che sono, mò veramente me facite ascì pazzo, io me so’ assettato nu momento accussì, o vì. (Siede c.s.)

NICOLINO: Oh! Chesta è bella, nce stanno le campanielle dinto a lo lietto.

TUTTI: Vuje che dicite? (Ridendo.)

SAVERIO: Sangue de Bacco, è overo. (Alza un materasso e tira fuori un campanello, quello di Rosina seguita a suonare.) E bravo! M’hanno fatto lo scherzetto, io vularria sapé chi è stato chill’animale che s’ha voluto divertì cu me.

NICOLINO: È curiosa!

CICCILLO: E seguita ancora.

SAVERIO: Nce ne stà n’ato sotto a muglierema. (Nicolino va ad alzare il materasso dove sta Rosina.)

ROSA: Uh! Mamma mia, mariuole, mariuole.

NICOLINO: Siente a chest’ata, simme mariuole mò, io v’aggia levà lo campaniello a sotto. (Esegue.) Eccolo qua.

SAVERIO: E bravo! Vularria sapé proprio chi me l’ha miso, lo pigliarria a cauce.

MARIETTA: Vurria sapé pur’io a chi l’è pruduta la capa.

SAVERIO: Vì che razza d’albergo sò ghiuto truvanno, me dispiace ca tengo a muglierema cu le delure ncuorpo si no mò proprio me ne jevo.

NICOLINO: Scusate, signore, sono proprio mortificato.

SAVERIO: Va buono, pe mò jatevenne, quanno è dimane parlammo.

NICOLINO: Rinnovo le mie scuse. (Ciccì sì stato tu?).

CICCILLO: Io, no.

NICOLINO: Marié si stata tu?

MAIETTA: Ma che site pazzo?

NICOLINO: Va trova chi è stato. Andiamo. (Viano.)

ROSA: Savè se pò sapé ch’è succiesso?

SAVERIO: Niente, duorme.

ROSA: Ah! Me so’ venute le delure cchiù forte.

SAVERIO: Vuò essere fatto nu cataplasemo?

ROSA: Che?

SAVERIO: Vulisse nu cataplasemo?

ROSA: Sì, e miettece nù poco de laudon ncoppa.

SAVERIO: Ccà nce sta tutte cose, mò vaco dinto a la cucina e te lo faccio. (Prende l’occorrente dalla valigia e via prima a destra.)

ROSA: Ah! Ah! Che dulure! (Scena a piacere e poi si addormenta a concerto.)