SCENA QUATTORDICESIMA

PASQUALE (solo dal fondo): Ma chillo D. Antonio è na vera sanguetta, non saccio comme me ne so’ liberato. Lasseme chiammà a Sangenella. (Si russa.) Ah! Già s’è ghiuta a cuccà, e che bello runfo che tene, me pare nu contrabasso. S’è addurmuta, tanto meglio. Mò me cocco pur’io, chiano, chiano pe non la fà scetà, accussì pozzo durmì nu poco, tengo nu suonno che vaco cadenno. (Si spoglia.) E se capisce, stanotte nun aggio durmuto pe causa della vasca dei pesci, sta jurnata aggio avuto chesta battaglia, mò me sento stanco comme a nu cavallo de notte; mò nun ce metto niente e m’addormo proprio. (Primo segno luce — si mette sul letto e sbadiglia.) Non me fido de tené manco l’uocchie apierte. (Rosina russa.) Ma sta luce me secca. (Secondo segno luce — Pasquale chiude l’interruttore — scena oscura poi dice delle altre parole a soggetto finché s’addormenta.)