SCENA SECONDA

Mimi, poi Salvatore.

MIMÌ (d.d.): È permesso?

TERESINA: Oh! compariè, avanti.

MIMÌ: Commarella mia, ched’è? Non saccio comme ve veco.

TERESINA: Tengo lo veleno anzi li diente, si dongo nu muorzo a uno l’avveleno.

MIMÌ (scostandosi): E ch’è succiesso? Pecché tutto stu veleno?

TERESINA: Comme, vuje non sapite niente?

MIMÌ: No.

TERESINA: Questa notte, all’albergo Riviera, aggio ncucciato a maritemo cu na femmena.

MIMÌ (con gioia): Veramente? oh! Che piacere, che. consolazione, è venuto lo mumento.

TERESINA: Comme, ve fa piacere che maritemo m’ha tradito?

MIMÌ: E se capisce, io aspettavo stu momento come la manna nel deserto.

TERESINA: E pecché?

MIMÌ: Pecché isso v’ha tradito, e vuje facite lo stesso, e siccome tengo la vostra parola, sarò io quello che farò le vostre vendette.

TERESINA: E va bene, pò ne parlammo de chesto, cumpariè.

SALVATORE: La signora Sciosciammocca.

MIMÌ: La moglie di D. Felice.

TERESINA: E che vene a ffà ccà?

MIMÌ: Forse ve vene a dicere ca lo marito l’ha tradita.

TERESINA: Comme, pur’isso?

MIMÌ: Sissignore, con una donna maritata e lo marito io l’aggio conosciuto ncopp’all’albergo Riviera, me l’ha presentato D. Pascale.

TERESINA: Guè s’hanno data la mano. (A Salvatore:) Fà trasì a signora.

SALVATORE (alla porta): Signò, favorite. (Via.)