SCENA TERZA

Concettina e detti.

CONCETTINA: Grazie! Signora scusate se... oh! D. Mimì state ccà?

MIMÌ: Sì, signora.

CONCETTINA: Sono stata a casa vostra e lo portinaio m’ha ditto ca stiveve ccà. (A Teresina:) Signora mia non sapete, mio marito mi ha tradita con una donna maritata.

TERESINA: E mio marito pure ha fatto lo stesso.

MIMÌ: Ma vuje comme avite saputo ca D. Felice steva ncoppa all’albergo Riviera?

CONCETTINA: Pecché doppo chello ca me dicette a signora ajere, io lo mettetto na spia appriesso. Jerisera la persona ca lo sorvegliava me venette a dicere che l’aveva visto trasì dinto all’albergo Riviera cu na signora. Allora io senza perdere tiempo, currette ncoppa all’albergo e lo ncucciaje co la nnammurata.

TERESINA: Scusate, signò, ma vuje ne site certa ca D. Felice tene na nnammurata?

CONCETTINA: Guè, ne site certa? Si l’aggio ncucciato a tutte e dduje.

MIMÌ: Io pure lo vedette, quanno jette a cagnà la valigia e manco chella era.

TERESINA: Mi fa meraviglia, perché D. Felice venette cu me all’albergo Riviera.

MIMÌ E CONCETTINA: Con Voi?

TERESINA: Sissignore, m’accumpagnaje pe me fà cogliere a maritemo cu la nnammurata; io pò me ne jette e lo lassaje llà, non saccio pò...

CONCETTINA: Ecco, quanno vuje ve ne isteve, isso jette dinto a la cammera de la nnammurata, e la prova è che stanotte non s’è ritirato, è stato con la sua bella.

MIMÌ: No, signora, voi che dite? (Ride.) A D. Felice l’arrestajeno.

CONCETTINA E TERESINA: L’arrestajeno?

MIMÌ: Già, e si nun ce steva lo delegato cu le guardie sapite che paliatone aveva D. Felice da lo marito de la nnammurata soja. Chillo menava mazzate de morte.

CONCETTINA: Benfatto io avarria voluto ca l’avevessero struppiato. Avita dicere Donna Teresina mia ca io non l’avevo creduto, neh vaco a trasì dinto a la cammera e lo trovo cu na figliola.

MIMÌ: Mariti svergognati e porci!

CONCETTINA: Io pe tramente l’aggio restato nu biglietto a lo guardaporta dicennele: «Vado dal mio amante. Non mi vedrete più» per vendicarmi de chello che m’ha fatto. E sapite chi aggio ditto ch’era il mio amante?

MIMÌ: Chi?

CONCETTINA: Voi! D. Mimì Chiappariello!

TERESINA: Oh! Questa è bella! (Ride.)

MIMÌ: No, questa è brutta! Chillo è capace che vene da me per avere una riparazione.

TERESINA: Ma che riparazione! Chillo D. Felice è nu cucuzzone. Signò, venite cu mmico dinto e vedimmo che s’addà fà. Eh! Caro marito, non l’aviva maje fà chesto. Venite vuje pure D. Mimì. (Viano.)