SCENA QUARTA

Felice, poi Teresina.

FELICE (avvilito, avrà una ferita alla fronte coverta da cerotto): È permesso? E ched’è non ce sta nisciuno? Ah! La capa, li rine... E che bello paliatone aggio avuto stanotte. Chillo canucaro le baccalajuolo doppo ca dicette nfaccia a lo delegato: Chisto è lo nnammurato de muglierema aizaje la mazza ppà e me la dette ccà, non saccio comme non me restaje friddo nterra. Eh! Ma io fuje scaltro, dette na vuttata a le guardie, ntela e me ne scappaje. Basta, mò so’ venuto ccà pe sapé da Donna Teresina c’ha fatto stanotte, comme è fernuta fra essa e D. Pasquale, addò starrà? (Guarda a sinistra e retrocede spaventato.) E ched’è llà dinto? Nce stà nu muorto? E chi è muorto? (Legge:) «Questa camera è chiusa per la morte di Pasquale Corella». oh! Povero D. Pascale! E comm’è muorto? Forse lo marito de la nnammurata doppo vattuto a me, l’avette dà quacche peroccolata ncapa e l’ha acciso.

TERESINA: Oh! State ccà?

FELICE: Donna Teresì, fatevi coraggio, segno che così era destinato.

TERESINA: Avite ragione, chi se lo poteva mai credere.

FELICE: E tutto questo è successo per causa mia.

TERESINA: E voi che c’entrate? Per causa di mio marito dovete dire: è stato isso che ha voluto che la cosa finisse così; meglio pe tutte e dduje. Da parte mia, caro D. Felice, non tengo nessun rimorso pecché chello che l’aggio fatto nce l’aveva prevenito.

FELICE: Come, siete stata voi che?...

TERESINA: L’ho punito come si meritava. E stanotte stessa senza perdere tiempo, appena s’è retirato l’aggio combinato lo servizio. (L’aggia fà piglià na bronchite dinto a chillo stanzino da bagno).

FELICE: (Dunque è stata essa che l’ha acciso, non è stato lo marito de la nnammurata? Nce vò nu bello coraggio! E chi nce vò avé che fà cu chesta?).

TERESINA: Ma ched’è? Vuje parlate sulo?

FELICE: No, pensavo a muglierema. Sapete che m’ha combinato? Se n’è scappata co lo nnammurato.

TERESINA: Come?

FELICE: So’ ghiuto a casa e lo guardaporta m’ha dato stu biglietto. (Legge:) «Vado dal mio amante D. Mimì Chiappariello; non mi vedrai più».

TERESINA: (Benissimo, se l’ha creduto). Come, come D. Mimì è l’amante di vostra moglie?

FELICE: Me l’ha scritto essa stessa.

TERESINA: Già, avete ragione, e mò che pensate de fà?

FELICE: Ecco qua, io direi: voi siete libera, mia moglie tiene a Chiappariello, fuimmencenne tutte e duje.

TERESINA: Nce ne fujmmo? E vuje site pazzo?

FELICE: No, ’a pazza siete voi che vulite restà ancora ccà, e che a momenti ve veneno arrestà duje guardie e ve porteno ngalera.

TERESINA: Me porteno ngalera? (È pazzo D. Felice).