SCENA SECONDA

Federico, e detti poi Nannina.

FEDERICO: Oh, signori, vi saluto. (I due non rispondono.) Lo servitore m’ha ditto che so’ asciute tutte quante, non sapete dove sono andati? Che è successo D. Ciccì, state contrastati? (Nell’uscire porta un cassettino che posa sulla conzola.)

CICCILLO: Ho preso un piccolo sbaglio per ragione di gelosia, adesso mi sono andato a sottomettere, l’ho pregata, l’ho chieste scusa, e essa niente, non vò fà pace. D. Federì vedete voi?

FEDERICO: Aspettate. Signora Elena, ve ne prego io, finite questa cosa. Vostro marito se è geloso, è segno che vi vuol bene assai, la gelosia sapete, è figlia dell’amore.

ELENA: (Li lettere l’avite portate?).

FEDERICO: (Sissignore, mò nce li dongo a Nannina, ma vi ricorderete di me qualche volta?).

ELENA (spezzando il discorso): Va bene, non ne parlammo cchiù, vuje me prommettite de non sospettà cchiù de me?

CICCILLO: Mai più. Abbraccieme, moglie mia. (Si abbracciano.)

FEDERICO: Avite visto, si non veneva io, non se faceva niente.

CICCILLO: D. Federì, vi prego di accettare questo bocchino, lo terrete per mio ricordo.

FEDERICO: Oh, vi ringrazio, l’accetto con piacere. (Si prende il bocchino.)

ELENA: (Che faccia de cuorno).

FEDERICO: Mò diciarria jammoce a fà na passiata abbascio a lo ciardino, pigliammo no poco d’aria.

CICCILLO: Si, dite bene. (A Elena:) Vuò venì?

ELENA: Fate primme vuje, io aspetto a Nannina, quanno vene, scengo co essa.

FEDERICO: Allora jammo nuje D. Ciccì. (Voglio vedé si me pozzo fà mprestà nu centenaro de lire). (Si mette Ciccillo sotto il braccio.)

CICCILLO: Te raccomanno viene ampressa. Te faccio trovà no mazzettino de tutte gelsummine e rose the.

FEDERICO: Ah, bravo. Allora sapite che facimmo? Quanno vuje avite fatto lo mazzetto...

CICCILLO: Lo menammo dinto a lo bollito.

FEDERICO: Nonsignore, quanno vuje avite fatto lo mazzetto, io la vengo a chiamare. Jammoncenne. (Viano pel fondo a sinistra.)

ELENA: Seh, e io piglio e vengo co ttico, staje frisco. Vì che faccia tosta.

NANNINA: Mamma mia che scuorno, che scuorno.

ELENA: Guè Nannì, che è stato?

NANNINA: Papà ha voluto j pe forza ncoppa alla sezione, m’ha voluto portà pure a me, llà nce stevene tanta gente, tanta guardie.

ELENA: Ncoppa a la Sezione, e pecché.

NANNINA: Pecché dice che Errico stanotte m’ha da sparà.

ELENA: E pe quà ragione?

NANNINA: E io che ne saccio. So’ duje juorne che papà non è cchiù isso, sbarea sempe, io aggio appaura, Elena mia che papà nzieme co Don Celestino so’ asciute pazze. Dico il pecché Errico m’ha da sparà, chillo me vò tanto bene.

ELENA: Ma che sparà, tu che dice, avarranno pigliato quacchè sbaglio, siente a me.

NANNINA: E chesto l’aggio ditto pur’io, ma lloro niente, non se fanno capace.