SCENA QUARTA

Federico, poi Nannina, poi Nicola e Felice, poi Bernard, indi Ciccillo.

FEDERICO: L’aggio menata la stoccata, ha ditto che mò non li tene; dimane me li dà, quanno è dimane me mposta sotto a lo palazzo sujo; ma quanto è seccante, parlà sempre de na cosa.

NANNINA: D. Federì, m’avete portate chelli là?

FEDERICO: Sissignore. Ma vuje pecché avite ditto tutte cose a papà.

NANNINA: Che cosa?

FEDERICO: Che io faceva l’ammore co la mugliera de D. Ciccillo.

NANNINA: Io? Aggio ditto chesto, quanno maje. (Comparisce Nicola e Felice.)

FEDERICO: E comme va che D. Nicola sape tutto?

NANNINA: E chi ne sape niente... facite priesto, dateme chelli lettere.

FEDERICO: Cheste so’ lloro, tenite. (Gliele dà.)

NICOLA (si avanza e strappa le lettere dalla mano di Nannina): A me quelle lettere!

NANNINA: Ah, no papà.

NICOLA: A me quelle lettere, ti dico!

BERNARD: Che è stato, ccà s’allucca sempe.

CICCILLO: Che è successo?

NICOLA: Niente... niente, questa volta non è stato proprio niente. (Piano a D. Ciccillo e con fretta.) (D. Ciccì, stracciate sti lettere pe ccarità!) (Dà le lettere a Ciccillo il quale le lacera subito.)

BERNARD: Ma Nannì, che è stato, perché staje accossì? Ma parla, io voglio sapere di che si tratta. D. Nicò perché stavate gridando?

NICOLA: Domandatelo al vostro caro amico.

FEDERICO: Testimone?

CICCILLO: E che testimone?

BERNARD: Chille so’ duje pazze, che ne volite sapé, io n’ora fa me steva passanno la difesa che debbo fare per quella causa che tengo, chille so’ venute a tiempo, e se credevano che io voleva accidere a Nannina. (Tutti ridono.) Mò và trova che auto sarrà succieso, jammo a sentì Nannina che dice. E ghiammoce a spassà no poco. A proposito tu hai portate li pistole?

FEDERICO: Sicuro, eccole ccà.

BERNARD: E ghiammo. (Via con Federico), non li danno udienza chille so’ pazze.

FEDERICO: E no fatto, dice buono. (Viano pel fondo.)

CICCILLO: No, chillo D. Nicola veramente è ghiuto mpazzia, allucche sempe, sta sempe arraggiato, po’ m’ha fatto straccià chelli lettere, va trova che mbroglie sarrà. Mò vado a vedere come tirano al bersaglio. (Via.)