SCENA QUINTA

Teresina e detti.

TERESINA (in gran toletta): Guè, vuje state ccà?

FELICE: Teresina... (Ad Alfredo:) Dunque la lettera nun l’avuta.

ALFREDO: Ma pe chì nce l’haje mannata?

FELICE: Pe la posta... la mpustaje ajersera... Napole pe Napole.

ALFREDO: Napole pe Napole... si nun passano tre ghjuorne nun l’have.

TERESINA: Neh, giovinò, che d’è nun me dicite niente? L’aggio fatto tarde?

ALFREDO: No, anze.

FELICE: (La vularria affugà).

TERESINA: No, pecché nun voglio perdere la colezione.

FELICE: Ma nc’è tiempo.

TERESINA: Meglio, veco pure lo matrimmonio. (Ad Alfredo:) Nun aggio visto ancora nisciuno.

FELICE (ad Alfredo): Vide de ne la fà j.

ALFREDO: Mò veco. (Voce di Giulio di d.)

FELICE: Mio suocero!