SCENA SESTA

Giulio e detti.

GIULIO: Guè Felì, io mò vengo. (Affarato, vede Teresina.) Come, signora, vuje state ccà. (Ai 2.) E nun m’avite ditto niente.

TERESINA: No, so’ stata io che nun v’aggio vuluto fà disturbà.

GIULIO: Ma che! Vuje nun facite che piacere... ma scusate io calo nu mumento aggia j a comprà cierti guante a muglierema, s’è ghiuto a mettere li suoje e l’ha stracciate.

FELICE: Allora mò nce vaco io.

GIULIO: Me farrisse piacere, bianche, lunghe, de pelle de capretto, a 6 bottoni... numero 8

TERESINA (fra sé): (Chisto è pede nun è mano).

FELICE: 8 ... Va bene. (Via pel fondo.)

GIULIO: Pigliate na carruzzella faje cchiù priesto.

ALFREDO: (Mò m’ha lassato sulo!). Francamente, se io pure pozzo farve quacche cosa.

GIULIO: Sicuro! Vuje m’avita fà lo piacere de scrivere li nomme de l’invitate ncoppa a sti piezze de carta, pe metterle dinto a li salviette.

TERESINA: Bravo! Nun ve scurdate lo mio. (Sottovoce ad Alfredo.)

GIULIO (dandogli un’altra carta): Chesta è la nota. (Mostrando la porta a sin.). Jatevenne dinto a lo gabinetto mio, là state quieto, quieto... la signora l’accompagno io dinto a lo salotto e fernesco de preparà.

ALFREDO: (Mò vò restà sulo cu Teresina... e si a chella le scappa quacche parola da la vocca). (Fa dei segni a Teresina di tacere e via prima a sin.)

GIULIO (andando verso la seconda a d.): Vuje, signò, trasite ccà... mo ve manno a muglierema. (A mezza voce:) Nun avite paura... nun sape niente... io nun l’aggio ditto manco na parola.

TERESINA: De lo matrimmonio mio? (Alfredo apre piano la porta ed ascolta.)

GIULIO: (Chesta m’apre lo discorso essa stessa... putesse appurà).

TERESINA: Dunque voi sapete?

GIULIO: Saccio tutte cose.

TERESINA: E che me dicete?

GIULIO: Io non ho il diritto di giudicare.

TERESINA: Allora io conto pure su voi... se sentite de parlà de quacche cosa... vuje tenite tanta conoscenze...

GIULIO: Ve pare, subito v’avviso.

TERESINA: Io ve ringrazio assaje.

GIULIO: Non c’è di che.

TERESINA: (Meno male... spero che priesto me pozzo maretà pur’io). (Via seconda a d.).

ALFREDO: (Meno male!). (Ed entra.)