SCENA DECIMA

Lauretta, poi Achille, indi Felice e detti.

LAURETTA: Ninè, sentite na parola... Signori permettete?

NINETTA: I miei genitori. (Presentandoli.)

LAURETTA: Tanto piacere. (Ninè, pe carità currite fore lo giardino, stanno facenno nu duello co lo cavaliere e D. Felice).

NINETTA: (Nu duello? Vuje che dicite?). Papà tratteniteve nu poco dinta a la cammera mia, io mò vengo...

MICHELE: Ma pecché, ch’è stato figlia mia?

CONCETTA: Ch’è succieso? Tu staje tremmanno.

NINETTA: No, no, trasite, mò ce vedimmo. (Li spinge nella prima porta a sinistra.)

CONCETTA: Figlia mia, figlia mia. (Viano a soggetto.)

NINETTA: Priesto, nun perdimmo tiempo. (P.a.)

ACHILLE (uscendo): Addò jate, nun ve mettite paura, lo duello nun s’è fatto.

NINETTA: Ah, nun s’è fatto?

ACHILLE: No, pecché l’avversario appena s’è miso in guardia l’è venuto nu giramento de capa, è ghiuto nterra, allora l’avimmo fatto stregnere la mano e tutto è finito.

FELICE (uscendo): Mò moro, sto tremmanno ancora. Me credevo che l’avevo acciso. Chillo appena m’ha visto in guardia è ghiuto nterra.

ACHILLE: Chella combinazione t’ha salvato, putive passà nu brutto guajo.

FELICE: Embè, che ce vulite fa?

ACHILLE: Basta, l’onore è soddisfatto.

NINETTA: Ma pecché sì ghiuto a fa stu duello?

FELICE: Pe causa toja e te ne ringrazio.

NINETTA: Agge pacienza, so’ stata na bestia, ma da oggi in poi non parlo più, nun arapo cchiù la vocca.

FELICE: Speriamo.

LAURETTA: Ve site calmate? V’è passata la paura?

NINETTA: Sì, sì, grazie.

LAURETTA: Permettete, vado da mio marito. (Via pel fondo.)

ACHILLE: Dunque, me pozzo j a cuccà? Sei contento? Vuò niente cchiù?

FELICE: No, grazie, niente cchiù. Scusami sà?

ACHILLE: Macché, è dovere d’amicizia. Arrivederci, scusate pecché nun ne pozzo cchiù.

FELICE: Avimmo fatto nu bello duello.

ACHILLE: Sì, chillo de l’opera de li pupe. (Via sbadigliando a destra.)

NINETTA: Felì, marito mio, te pozzo dì na cosa?

FELICE: Che cosa?

NINETTA: Ma nun me strillà però!

FELICE: Haje fatto quacc’ato guajo? Parla, mò me trovo. De che se tratta?

NINETTA: Addivina dinta a la cammera mia chi nce sta?

FELICE: Chi nce sta?

NINETTA: Mammà e papà!

FELICE: Mammà e papà?

NINETTA: Sì, nun aggio potuto stà cchiù senza vederle, ajere li screvette e stammatina so’ venute.