SCENA TERZA

Giulietta e detti, poi Clementina.

FELICE: Che! Giulietta la Nanassa dinto a lo lietto mio!

GIULIETTA (dal letto): Signori, buongiorno.

PASQUALE: Bravo! Ti faccio i miei complimenti! Tenive chillo contrabbando e nom me dicive niente?

FELICE: Neh, che t’aveva dicere?... Tu comme te truove dinto a lo lietto mio?

GIULIETTA: Ah, ah, ah! (Ride.) Chesta è bella!... Ma comme chesta non è la casa mia? Chisto non è lo lietto mio?

FELICE: Nonsignore!... Comme t’è venuto ncapo de venì ccà?

GIULIETTA: Io? Io non ne saccio niente. (Scende dal letto, si mette il sottanino.)

FELICE: Uh! Pascà, chella se sosa! Io tengo a muglierema bizzoca.

GIULIETTA (viene avanti): Vuje ajeressera addò me portasteve?

FELICE: Jettemo a lo teatro; pò jetteme a cenà, e pò addo te portaje?

GIULIETTA: Vuje me pare che dicisteve mò t’accompagno a la casa toja.

FELICE: Seh, accussì me pare; e pò, comme veniste ccà?

GIULIETTA: E che ne saccio, me purtasteve vuje. (Pasquale ride.)

FELICE: Pascà non ridere, famme stu piacere.

GIULIETTA: Vuje stiveve mbriaco de chella manera!

FELICE: Io sulo? E tu non stive mbriaca?

GIULIETTA: Io non me ricordo proprio niente, me ricordo soltanto lo ritornello de chella bella canzone che sentette a lo teatro: Viva viva, tra llà rà! (Alza la gamba.)

FELICE: Zitta!... Ca si esce mugherema, io so’ rovinato!

GIULIETTA: Che sento! Vuje site nzurato?... E da quanto tiempo?

FELICE: So’ 8 mise, chillo Pascale lo ssape.

GIULIETTA: Da 8 mise?... E me portate a lo teatro, me portate a cenà, ve imbriacate de chella manera, all’ultimo pò me portate pure dinto a la casa vosta? E pe chi m’aviveve pigliata a me! Io sono una giovine onesta, capite? Giulietta la Nanassa, è conosciuta a Napole, ha fatto la fioraia onestamente!

PASQUALE: D.^a Giulié, calmateve...

FELICE: (Vuje vedite che guajo che aggio passato!). Donna Giulié sentite...

GIULIETTA: Che debbo sentire! Non voglio sentir niente!... Viva viva, tra llà rà! (Alza la gamba ridendo.) Ah, ah, ah!... Ma sapete che chesta è stata veramente na cosa curiosa. Io stanotte aggio dormuto dinto a chillo lietto, credenno che era lo lietto mio... e a proposito, vuje addò avite dormuto?

FELICE: Dinto a lo stipo, l’avetta piglià pe na cammera, l’arapette e me cuccaje. (Va a spiare seconda a sinistra.)

PASQUALE: Poco primme l’aggio scetato io.

GIULIETTA: E la mugliera addò è stata stanotte?

PASQUALE: La mogliera dorme dinto a n’ata stanza.

GIULIETTA: Ma è na bella figliola?

PASQUALE: Che figliola, chella tene 58 anne.

GIULIETTA: Scuse! Ve l’avite pigliata piccerella! (Ride.)

FELICE: Pascà stà venenno, sta venenno.

PASQUALE: Scappate D.^a Giulié. (L’accompagna all’alcova e la fa entrare.)

CLEMENTINA (con due tazze di cajfe): Ecco ccà lo cafè; ne ho portate due tazze, una anche per voi.

PASQUALE: Grazie, signora.

CLEMENTINA: È dovere. (Giulietta di dentro all’alcova fa uno sternuto.)

FELICE: Salute.

PASQUALE: Salute.

FELICE: Grazie.

PASQUALE: Grazie. D.^a

CLEMENTINA: Ched’è sta veste ncoppa a sta seggia, de chi è?

FELICE: Pascà, de chi è chella veste?

PASQUALE: Stava sopra una sedia... questa veste... è una veste.

FELICE: (Ha trovato na bella scusa!).

CLEMENTINA: Ho capito, è l’abito che mi ha mandato la sarta, l’aspettavo da 15 giorni, tanto che ajere le mannaje pure na lettera nu poco risentita; ma perché l’hanno portato qua, vorria sapé? (Lo prende.)

FELICE: Ma come, tu ti hai ordinato un abito così chiaro... tu vesti sempre di nero.

CLEMENTINA: Ma io non sò niente, io sono solita di dire alla sarta: fammi un abito, poi sceglie essa la stoffa e il colore. È un poco troppo chiara, sì, è overo, ma pe sta vota non fa niente, lo metterò il giorno della nascita tua.

FELICE: (La nasceta de mammeta!).

CLEMENTINA: Permettete D. Pascalì, mi vado a conservare quest’abito.

PASQUALE: Fate signora. (Clementina via a sinistra, Pasquale ride.)

FELICE: S’ha portata la vesta de chella, e comme se fa?... Non ridere Pascà, che tu cu sta risa m’indisponi!