SCENA PRIMA

All’alzarsi della tela la banda suona di d^o. Tutti gl’invitati escono dalla destra a braccetto passeggiando, poi nel terminare il pezzo di musica, viano per la porta in fondo a sinistra; esce dalla destra Biase con guantiera di dolci e Salvatore dalla sinistra correndo, si urtano, indi Carmela e Luisella.

SALVATORE (che si è urtato con Biase): Ma che sì cecato?

BIASE: Io so’ cecato? Tu te mine comme a nu ciuccio.

SALVATORE: Vallà vatté, và fà lo craparo!

BIASE: Salvatò pe tutto stasera te sciacco! (Via.)

SALVATORE: Mò vedimmo chi fa cchiù ampressa!

CARMELA: Salvatò che faje lloco? T’aggio ditto statte fore pe ricevere l’ati invitate che hanna venì.

SALVATORE: Va bene. (Via fondo a destra.)

CARMELA: Ah, chella sora mia, me fa proprio avutà lo stommaco, s’è miso a uno pizzo tutta mpupazzata, e non dice na parola.

LUISELLA: Va bene ch’è piccerella, e se mette scuorno, ma me pare troppo, la verità.

CARMELA: Ma che piccerella, che scuorno, io quanno tenevo l’età soja, ascevo da dinto a lo fuoco, me prudeva la capa de na mala manera.

LUISELLA: Che c’entra, tu pò sì n’ata cosa.

CARMELA: Che saccio, chella non me pare maje sora... ma ched’è stu scuorno. Uh! Io non aveva nascere dinto a stu paisiello, miezo a sti turze, scuse sà, io non parlo de te parlo de l’ate. Mamma mia, nisciuno sape accucchià quatti parole pulite, nisciuno sape leggere, sulo lo Sinneco e 3 consigliere sanno leggere e scrivere nu poco, ma appena appena quacche cosarella. Ah, me parene mille anne che chella stupeta de sorema se mmarita, ne voglio fà zumpe.

LUISELLA: Comme! Te ne vaje da ccà?

CARMELA: Se capisce, che voglio murì Luisella mia, me ne vaco a Napule, voglio vedé facce belle, allegre... ccà stasera l’invitate pe fà troppo li signure, me parene tanta mazze de scope!

LUISELLA: Haje ragione.