SCENA QUINTA

Cesare, Giulietta e Felice.

Di dentro si sente una forte risata di Giulietta.

CESARE (portando a braccetto Giulietta, con abito da festa di gran lusso. Felice li segue portando sul braccio la mantella di Giulietta. Cesare ha in mano delle carte di musica): Haje ragione de ridere, la gente de stu paese, è accussì curiosa, che uno a guardarla ha da ridere afforza.

GIULIETTA: Specialmente chillu servitore che avimmo trovato fora la sala. (Ridendo.)

CESARE: Salvatore, Salvatore. (Ride.)

GIULIETTA: Me l’accattarria proprio! (Ridendo.) E pò avite viste, tutte quante pe la strada me guardavano ncantata, comme fosse stata na cosa nova pe lloro.

CESARE: E pe lloro na cosa nova è, quanto mai hanno viste na signora tanto bella, e vestuta de chesta manera?

GIULIETTA (seria): Felì, che hai marito mio, perché stai tanto di cattivo umore?

FELICE: Io no, anzi sto allegnissimo.

CESARE: Sì, pur’io me so’ accorto che stai nu poco nervoso, seccato... pecché?

FELICE: Eh, penzo a le malate, puverielle, m’aspettavano, e io non ce so’ ghiuto.

CESARE: Ma te pare che putimmo penzà le malate mò, che nce ne preme... pensiamo a noi, pensiamo a divertirci.

GIULIETTA: Viva, viva, tra lla rà. (Movimento.)

FELICE: (D.^a Giulié, ccà v’avita da stà sodo co la gamma!).

CESARE: Aspettate, vado ad avvisare le altre mie nipoti, mò vide quante te vedono che succede ccà, bella, simpaticona mia! Io si tenesse na mugliera accussì, zumparria pe la priezza... e chillo pare ch’ha passato l’ultimo guajo!... Teh!... Guardannola sulamente te fa friccecà lo sango dinto a li vene. Viva, viva, tra llà rà. (Fa il movimento, lazzi, entra a sinistra, Giulietta ride.)

FELICE: D. Giulié, non redite che me facite attaccà li nierve.

GIULIETTA: Non potite credere comme me sto divertendo.

FELICE: E vuje non potite credere, comme me sto ntussecanno... vuje m’avite miso dinto a nu brutto guajo!... Io aggio rimasto muglierema a casa durmenno, non saccio si lo cocchiere l’ha scetata o no. E si appura che io so’ venuto ccà cu buje, e v’aggio passata pe essa... addò me vaco a mettere?

GIULIETTA: Ma che deve fare, che deve dire. Alla fine io non ho preso il suo posto per sempre, appena appena fino a domani mattina. Se poi vogliamo seguitare...

FELICE: A chi? Site pazza? Io aggio passato chilli guaje stanotte, e chi sa quante n’aggia passà... Lo ssapite che stevo facenno pure nu duello?

GIULIETTA: E cu chi?

FELICE: Col vostro antico amante, il Sig. Errico Delfino, che fortunatamente, sapenno che io ero nipote a D. Cesare, amico di suo padre, ha mpattate le carte, e non ha parlato cchiù.

GIULIETTA: E pecché aveva fà stu duello cu vuje?

FELICE: Pecché stanotte, a la trattoria a Posillipo, v’ha visto nzieme cu me, s’ha attaccato li nierve, e che saccio che m’ha ditto, io l’aggio risposto, nce simme appiccecate, e all’ultimo io le vulevo menà na butteglia nfaccia.

GIULIETTA Uh! E io non me ricordo niente.

FELICE: E che vulite ricurdà, chillo l’appicceco è stato quanno nuje teneveme lo vino fino a ccà. (Indica la gola.)

GIULIETTA: Guardate che combinazione! Me dispiace che m’ha visto mbriaca...

FELICE: No, chillo pur’isso steva miezo fatto.

GIULIETTA: E stasera, sapite, isso sta ccà.

FELICE: Lo ssaccio, è venuto a conoscere a mia cugina che se l’ha da spusà.

GIULIETTA: E io pirciò aggio voluto venì, voglio vedé che faccia fa, quanno me vede.

FELICE: E si chillo dice a zi zio che non me site mugliera io comme la combino?

GIULIETTA: E che vulite da me, ch’aggia fà?

FELICE: Appena lo veco le conte tutto lo fatto, e m’aggia fà promettere che non dice niente. D.^a Giulié, non facimmo pazzie, sapete? Vuje quanno lo vedite nun lo date retta, ricordatevi che siete mia moglie, non me facite scumparì.

GIULIETTA: Oh, vuje pe chi m’avite pigliata? Io la moglie la so’ fare, capite?

FELICE: Me ne so’ addunato, quanno è venuto zi zio a la casa mia... E chello che ve raccumanno non bevite vino, liquore... si no ccà stasera facimmo n’ato guajo, vuje ve jate a cuccà sotto a nu pagliato e io ncoppa a n’albero de pigne!...

GIULIETTA: Oh, non ce penzate.

FELICE: Già... io non ve lasso li pede... Zitto... venene tutte quante... nu poco de cuntegne D.^a Giulié, un poco d’importanza... pensate che siete una signora.

GIULIETTA: Lassate fà a me. (Si soffia col ventaglio, con gran sussiego.)