SCENA PRIMA

Carmeniello prepara la tavola, disponendo le posate di stagno. Saverio entra e s’avvicina.

SAVERIO: Jamme, jamme. Avimmo mettere na tavola principesca! Sangue de Bacco, è stata proprio na fortuna pe me: lo nuovo sinnaco m’ha fatto sapé che stammatina vene a visità la trattoria mia. Naturalmente a me me conviene de farle trovà na colazione scicca! (Osservando la tavola:) Che so’ sti posate? Cheste so’ posate de stagno!

CARMENIELLO: E quale aggio piglià?

SAVERIO: Chelle d’argiento, animale! (Carmeniello esce e torna con le posate d’argento.) Mò, si non me stevo attiento, lo sinnaco trovava le posate de stagno!

CARMENIELLO: E co sto panaro de fiori ch’aggia fà?

SAVERIO: Tu ti devi mettere areto a chella fenesta, nascosto dietro lo parapetto, e aspiette. Quanno io dico: «Signò, guardate lo cielo che ve mena!», tu pigli e butti i fiori ncapo a lo sinnaco.

CARMENIELLO: Va bene, aggio capito.

SAVERIO: Tiene a mente, quando io dico: «Signò, guardate lo cielo che ve mena!».

CARMENIELLO: Va bene.

SAVERIO: Tu t’avisse distrarre? P’ammore de lo cielo!

CARMENIELLO: Va bene. (Esce a destra col paniere.)

SAVERIO: L’aggia fà rimanè a bocca aperta. Dice che sto sinnaco è nemico assaje de li femmene... è stato bbuono ca l’aggio saputo, così si m’addimanna, dico che pure io la penso accussì...