SCENA SETTIMA

FELICE (entra trafelato e stanco): Mamma mia, aiutatemi, io mò moro! Non me ne fido più de correre... Vuj vedite che guaio aggio passato stanotte! Ieri sera arrivaje a Castellammare doppo a nu viaggio de ventisette ore! Tenevo famme, sete... Trovaje na taverna, me mpezzaje e me facette nuovo nuovo! Miezo stunato de vino addimannaje: «Neh, scusate, per andare a Pozzano?», e lo tavernaro: «Da quella parte, però badate: è na bella cammenatella». E se facette na risata... La serata era bbona, e io tenevo genio de cammenà, pure per schiarirmi un poco la mente. Ma che vuò arrivà: camminaje cchiù de n’ora e mmeza... La notte era scesa e vi dico la verità, me mettevo paura. «Anima di papà mio, aiutatemi voi!» Dicenno chesto me trovaje vicino a no casale co na senghetella aperta. Entro, per domandare almeno dove mi trovavo, ma subito me so’ ntiso afferrà da na mano morbida e po’ na vocella accussì aggraziata m’ha ditto: «Pascà finalmente sì venuto! Appiccia nu fiammifero», Io che saccio, o è stato lo vino o ch’è stato... lo fiammifero s’è appicciato overo! Me l’aggio abbracciata e vasata. Quella s’è messa a strillà. è trasuto lo frate... «Chi è, chi ci sta qua dinto? Me voglio mangià lo core!» Pe scappà, aggia aperta na porta: era n’armadio. Finalmente aggio trovato la porta vera, me so’ miso a correre, e curre, curre curre... Io sto correnno da stanotte: tengo la gola arsa! Potesse avé nu bicchiere d’acqua, tengo na sete! (Bussa sul bicchiere.)