SCENA TERZA

Gennarino e detti.

GENNARINO: Signori, buona sera.

TUTTI: Bonasera.

GENNARINO (siede ad un tavolino): Rosì, damme na presa de Vermout. (Rosina via poi torna.)

CARLUCCIO: Nce aggio quatto.

PASQUALE: E io niente.

ERRICO: (Michè, è venuto l’amico.)

MICHELE: (Mò accomminciammo a smiccià la primma cannela).

AMALIA: (Lassemenne j, che nun mme fido de vedè vuommeche!). (Via.)

ROSINA (uscendo con Vermout): Che d’è neh, Gennarì, nun saccio comme te veco?

GENNARINO: E che ha da essere Rosina mia, nu juorno de chisto, mme vaco a menà da coppa a la banchina abbascio. Stammatina mme songo appiccecato n’ata vota cu zi Marianna, ha appurato che io faccio ammore cu ttico, e s’è fatto afferrà chello de li cane. E io a priarla, ma io la voglio bene, facitemmella spusà... ch’ella è na bona figliola... niente.., niente... tosta comme a na preta de mulino. Ma nun te n’incarricà, essa have voglia de fà, have voglia che dì, che io a tte m’aggia spusà, a rischio de qualunque cosa.

ROSINA: Gennarì, bada a chello che ffaje, io te voglio bene... ma rovinarte pe me pò, chesto nun lo vvoglio, si chella te ne caccia de la casa, si nun te dà nu soldo de la rroba che te spetta... tu comme faje?

GENNARINO: Oh, pe chesto nun nce penzà, in ultimi casi, io aggio fatta la penzata. Haje da sapè che quanno morette la bonarma de patemo, lo frate carnale de ziema, lassaje nu cassettino chino le Napoliune d’oro... Chillo cascettino nun l’aggio visto, e nun saccio addò cancaro sta... ma si la sciorta mme fa appurà addò lo tene, appena lo veco mme lo piglio!

ROSINA: E che ntienne de fà pò?

GENNARINO: Quanno m’aggio pigliato lo cascettino, nce ne scappammo in America.

ROSINA: No, Gennarì, levete sti penziere da capo. Sperammo a lo Cielo che zieta se persuadesse e facimmo le ccose cu tutte li rregole.