SCENA SETTIMA

Porzia e Rocco indi Rita e detti.

ROCCO (di dentro): Ccà sora mia, da chesta parte.

PORZIA (idem): Ah! Ca si lu trovo l’accido!

FELICE (che ha fatto un salto dalla sedia): (Mammà nzieme co ziemo?! So’ arroinato!). (Cade svenuto sulla sedia.)

ROSARIA: Uh! Mamma mia chisto fosse muorto? D. Felì? D. Felì? Uh! Comme faccio? Chille stanno trasenno... Ah! mò moro pur’io. Ah! Aspetta! (Lo copre con una veste ed uno scialle.) Mamma mia, io mò moro de paura!

ROCCO (fuori con Porzia): Addò sta?

PORZIA: Frato mio chello che te prego, non te piglià collera.

ROCCO: No sora mia, io aggio da fà revotà la casa.

ROSARIA: Signori miei a chi jate trovanno?

PORZIA: Vaco truvanno a figliemo Feliciello, a chill’assassino.

ROCCO: E si non me dicite addò sta, sarranno guaje pe buje. Tu t’haje da sapè addo sta, pecché si non sbaglio chillo co ttico fa l’ammore.

ROSARIA: Voi sbagliate mio caro, io chisto D. Feliciello non lu conosco manco pittato.

PORZIA: Guè, senza ca lu nieghe cevettola, io stesso t’aggio visto affacciata a chella fenesta, fà smorfie co figliemo.

ROSARIA: Ah! Na vota, ma po’ nce appiccecaiemo!

ROCCO: Non è lu vero.., tu nce faje l’ammore ancora... guè piccerè, sa che t’avviso? Vide de non guardarlo manco nfaccia, si no te faccio no brutto straviso.

RITA: Neh, che so’ sti strille?

ROSARIA Che saccio, sti duje diceno che so’ pariente a uno chiammato Feliciello, e cullo ha ditto ca me vò fa no straviso.

RITA: Chi chillo?

ROCCO: Io sì.

RITA: Tu faje lo straviso a sorema? Vattenne sbruffone, fanfarrone, si no t’adderizzo na seggia ncapo.

ROCCO: Ferma sorella, tu sei donna e non ti conviene. Voi avete detto che me adderizzaveve na seggia ncapo a me? A Rocco Gigante soprannominato Saetta. (Per inveire.) Hai ragione ca sì femmena, manname na quarantina d’uommene e po’...

PORZIA: Va buono Rocchetiè, non me fà mettere paura.

ROSARIA: (Rì per carità puortatillo dinto, chillo Feliciello sta sotto a chilli panne, lo voglio fà fuì!).

RITA: (Nientemeno!). Nzomma che volite?

PORZIA: Simme sagliute pecché ccà è venuto Feliciello figliemo, chillo m’ha fatto no guaio!

RITA: Embè dinta a sta cammera ccà avite visto ca non nce sta, fora a la sala nemmeno, dunque jammo a vedè pe li cammere de dinto.

PORZIA: Brava, mò parlate da femmena.

ROCCO: Si deve per forza far mettere paura a voi altre donne.

RITA: Venite co mme. ( Viano tutti meno Rosaria e Felice.)