SCENA SETTIMA

Rosaria, poi Porzia, indi Pomarol.

ROSARIA: Chi è sta figliola ca me va trovanno?

FELICE: Songh’io bellezza mia.

ROSARIA: Uh! Felicietto mio, e comme accossì vestito?

FELICE: L’aggio fatto pe non farme conoscere, pecché mammà me va truvanno, e m’ha puosto le spie ncuollo; te so’ venuta a salutà pe l’ultima vota. (Le bacia la mano.)

ROSARIA: E mò addò vaje?

FELICE: Me vaco a gittà a mare, nun voglio campà più. Mammà sta là dinto, primma ca me vede e me fa na paliata, voglio morire senza emozioni.., addio.

ROSARIA: Ah! No Feliciello mio tu sì pazzo, non fà chesto ca me faje morì pur’a me.

FELICE: Che dici morire? Ah! No... sei troppo bella... addio.

ROSARIA: No Feliciè, tu da ccà non te muove.

FELICE: Lasseme, voglio morì annegato! (Fugge.)

ROSARIA: Ah! Povero Feliciello! morire e perché?

PORZIA (che ha inteso): Povero Feliciello morire e pecché?... Ch’è stato?

ROSARIA: è stato ca vuje ne portato lo scrupolo, site contenta? Mò avite fenuto d’alluccà. (Piange.) Feliciello s’è ghiuto a menà a mare.

PORZIA: Che! Figliemo?!

ROSARIA: Sì, mò proprio, e vuje n’avite causa e colpa de la morte soje! Povero Feliciello! (Via piangendo.)

PORZIA: Figliemo a mare? Ah! (Sviene sulla sedia di Felice.)

POMAROL: Ecco l’aceto bella mia. (Vedendo Porzia.) Che! E Messalina? Neh, voi chi siete?... Io perdo la testa... Messalina dov’è andata?