SCENA PRIMA

Saverio, Biase e Aniello, poi Carmeniello.

SAVERIO (bussando al bicchiere): Ma insomma stu riesto se po’ avé?

BIASE: è mez’ora che stammo aspettanno.

ANIELLO (seduto al Contuar, a destra gridando): Carmeniello, Carmeniello? Aggiate pacienza, tuzzuliate n’ata vota, io non me pozzo movere pecché tengo la podagra.

SAVERIO (gridando e bussando): Cameriere, Cameriere?

CARMENIELLO (con piatto con moneta): Eccovi servito.

SAVERIO: E tanto nce voleva?

CARMENIELLO: Non è colpa mia signore, ho andato a cambiare, e il facchino ha tricato.

SAVERIO: Va bene. Le solite scuse. Jammoncenne jà. (Si prende il resto e via con Biase.)

CARMENIELLO: No, la scusa l’avite trovata vuje pe non me regalà manco no soldo.

ANIELLO: Benfatto! Benfatto! Tu lo cammariere non lo saje fà. (Startnuta.)

CARMENIELLO: Io non lo voglio fà, quanta vote ve l’aggio da dicere! Simme rimaste che a lo primmo de quaresima me ne vaco, e perciò non ne parlammo cchiù.

ANIELLO: Haje ragione che tengo la podagra e non me pozzo movere da ccà, si mo nò non me risponnarrisse accossì.

CARMENIELLO: Ma pecché, scusate, aggio da servì afforza vuje?

ANIELLO: Se capisce, pe tutte li ragione (starnuta) primme de tutto, t’avarrisse da ricordà che quatt’anne fa stive co lo pizzajuolo sotto porta Sciuscella, io te venette a piglià e te facette fà lo cammarriere de trattoria.

CARMENIELLO: Chesto non vò dicere niente, comme faticava llà fatico ccà.

ANIELLO: E tenive la sciassa ncuollo?

CARMENIELLO: Che me ne mporta a me de la sciassa! Pecché vuje quatt’anne fa teniveve la trattoria? Mò me facite mettere nterra e felicenotte!

ANIELLO: E che miette nterra, che miette nterra? (Starnuta.)

CARMENIELLO: Va buono D. Aniè, non ne parlammo, ogge è l’urdema Dommeneca de Carnevale, e cercammo de non fà chiacchiere. Miercorì, trovateve lo cammeriere pecché io me ne vaco.

ANIELLO: E tu trovete la cammera pecché non te voglio tenere cchiù dinta a la casa mia.

CARMENIELLO: Uh! Va bene, io chesto jeva trovanno! Me la chiamma cammera, no stanzino senz’aria, senza manco no fenestiello.

ANIELLO: E che ghive trovanno pe diece lire a lo mese?

CARMENIELLO: E avite tenuto lo core pure de ve li piglià, si non era pe me, chi v’accompagnava la sera fino a ncoppa?

ANIELLO: E tutta la rrobba che haje rotta, io pecché non me l’aggio fatta pavà?

CARMENIELLO (gridando): Quà rrobba! quà rrobba!