SCENA UNDICESIMA

Virginia e detti, poi Camillo.

VIRGINIA (con piatto di pappa): Eccola ccà, tanto bella, tutta mollica.

ALESSIO: Datemella, non lo facite alluccà, D.^a Virgì, attienta a la casa, io mò vengo.

VIRGINIA: Non dubitate, facite li fatte vuoste! (Alessio via con Rocco a destra.) Vuje che avite combinato?

FELICE (uscendo dal seggiolone): Io mò more, non me fido cchiù!

MARIETTA Ernesto addò sta?

FELICE: Sta abbascio, a lo puntone de lo vico aspettanno co na carrozza chiusa, jammoncenne.

VIRGINIA: E comme nce ne jammo?

MARIETTA: Chillo Zizio s’ha portata la chiave.

FELICE: Sangue di Bacco, e comme se fa? Scassammo la porta.

MARIETTA: Vuje che dicite!

VIRGINIA: Vuje pazziate!

ALESSIO (di d. gridando): Te si trovato proprio a tiempo, si no rummanive abbascio a lo palazzo!

CAMILLO (di d.): Meno male!

MARIETTA: Zì Camillo. (Scappa a sinistra.)

VIRGINIA: Tornate llà p’ammore de lo Cielo! (Felice torna al seggiolone.)

ALESSIO: Statte attiento a la casa. (Di d..)

CAMILLO: Non nce penzà! (Di dentro.)

FELICE: La brumma! La brumma! La brumma!

CAMILLO (fuori): Chi è? De chi è sto guaglione?

VIRGINIA: è lo figlio de la spicajola a lo puntone, lo padre lo voleva accidere pecché s’è appiccecato con la mogliera, la sora ha cercato mpiacere a D. Alessio, che se lo tenesse ccà no pare de juorne, povero piccerillo.

FELICE: La brumma, la brumma, la brumma!

CAMILLO: E datele a bevere chillo tene sete.

VIRGINIA: Aspetta, la zia mò te porta la brumma! (Via a destra.)

FELICE: La zuppetella, la zuppetella!

CAMILLO: Mò, mò, aspetta no momento. Lo stampatore, m’ha ditto che pe dimane me consegna li programme. N’aggio fatte stampà tre mila. Li denare pe la pubblicità non so’ maje perdute.

FELICE: La brumma, ha brumma, la brumma!

CAMILLO: No momento, vì comme va de pressa! Pe mò tengo unnece guaglione fra gruosse e piccerille, si ne piglie n’auti nove, pure so’ contento. Vinte sculare a 10 lire l’uno, so’ dujeciento lire a lo mese. Io spese non ne porto, me li metto sane sane dinta a la sacca.

FELICE: La zuppetella, la zuppetella, la brumma, la brumma!

CAMILLO: Vi che nce vò chella pe portà no bicchiere d’acqua. Mò te la vaco a piglià io, statte zitto. (Via a destra.)

FELICE (uscendo dal seggiolone): Mannaggia all’arma de mammeta, se n’è ghiuto uno, e n’è venuto n’auto! Mò la porta non sta chiusa a chiave, sarria no bello momento. (Alla porta a sinistra:) Signori, signorì... (Entra.)