IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
Gervasio e detti, poi Nicola e Pietro.
GERVASIO (dal fondo a dritta): Sta venenno lo princepale, nzieme co lo zio vuosto... sta pupa la faccio trasì dinto?
ANGIOLILLO: Sicuro, falla trasì. (Gervasio tocca un bottone della cintura di Gemma, e questa si volta a sinistra, e a piccoli passi come pupa entra prima porta a sinistra. Gervasio la segue.) Quanto è bella!... Quanto è simpatica!... (La segue imitando la camminatura di Gemma ed entra.)
NICOLA (dal fondo a destra seguito da Pietro che è un po’ brillo): Ve piace lo ciardino?
PIETRO: Magnifico! Me lo chiammate ciardino... chella è na massaria che non fenesce mai... io me so’ sperduto, si non era pe lo giardiniere che m’ha mparata la strada, sarrìa rimasto mmieze a li frasche... ma che aria! Che delizia!... Si me vene ncapo, me vengo tutte cose, me piglio na casarella da chesti parte, e non me movo cchiù da ccà.
NICOLA: (Volesse lo Cielo, accussì vedarrìa la mugliera ogne ghjuorno!). E si facite chesto, v’assicuro che campate cent’anne!... Avite visto la cantina?
PIETRO: Sissignore, me l’ha fatta vedé lo giardiniere, e che vino, neh, che sapore; me songo proprio consolato, chello è vino che quanno è trasuto ncuorpo, non te fa pensà a niente cchiù, te fa mettere de buon’umore.
NICOLA: E non fa male, avite voglia de ve ne vevere... A proposito, sapite ch’aggio visto la sposa?
PIETRO: Ah, l’avete vista? Bravo! Che impressione v’ha fatto?
NICOLA: Magnifica? È na bellezza rara! Solamente vuje sapite fà chelli cose?...
PIETRO: Grazie, siete troppo buono. E co tutto chesto, l’autriere, m’aspettava na folla de gente a la casa, invece, la venettene a vedé pochi giovinotti, e quacche viecchio che se trovaje passanno. Lo Marchese Fiore, per esempio, voleva che avesse cacciata la lengua, nce volevano i paccheri, o no?
NICOLA: Ma pecché... non tene la lengua?
PIETRO: Tene la lengua, ma non la caccia... pe quà ragione ha da caccià la lengua?
PIETRO: Allora, nce avarrieno volute 13 bottoni, e non si poteva... perché non capiscono, che llà ogni bottone tiene 9 rotelline, 5 mollette, e un piccolo cilindro.
NICOLA: (Và trova chisto che dice, io non io capisco!).
PIETRO: E pure, l’hanno pigliato a pazziella, non hanno calcolato affatto la mia abilità. Chella l’aggio fatta io sulo, capite, non so’ stato aiutato da nisciuno.
PIETRO: Sacc’io che fatica me costa? Chella si la portava a Parigi, me l’avarrieno pagata a piso d’oro, llà solamente capiscono la rrobba bona!
NICOLA: (Chisto che sta dicenno... io non lo capisco!).
PIETRO: E la mamma... l’avite vista la mamma?
NICOLA: Io mò che v’aggia dicere, me piace assai!
PIETRO (piano): Si me date mille lire v’ha dongo.
NICOLA: Eh!... (Meravigliato.) Me la date?!
PIETRO: Sicuro! M’è stata misa 800 lire, ma capirete, se io trovo a vantaggià...
NICOLA: E ve la vennite? E tenite sto core?
PIETRO: Uh! Tengo stu core?... oh! Chesta è bella! Io faccio chesto da 12 anne, chesta è l’arte mia.
NICOLA: Ah, chesta è l’arte vostra? E bravo! Evviva la franchezza. (Vì che bello galantomo... appena sposa nepotemo lo piglio a cauce!). Va bene, dimane ve dongo la risposta, nce voglio pensà no poco.
PIETRO: È giusto. Intanto, D. Nicò, permettete che giro n’auto poco, non potete credere quanto me piacene sti siti.
NICOLA: Girate, girate, facite chello che vulite vuje, trasite da llà, guardate. (Indica la seconda porta a destra.) Llà in fondo nce sta la loggia avite che vedé.
PIETRO: Grazie, da qua è vero?... Credete a me, fa bene no poco d’aria! Ah! Voglio respirà!... (A Nicola.) La mamma ve piace? Facite chello che vulite vuje, dateme mille lire e pigliatevella... chesta è l’arte mia, io accussì magno! (Via seconda porta a sinistra.)