SCENA SESTA

Angiolillo poi Felice.

ANGIOLILLO (dalla prima a sinistra): Gervasio non me vò fà stà ccà dinto, ha ditto che se trase zi zio, pare brutto che me trova vicino a essa; ma quanto è bella... quanto me piace! Mò capisco pecché l’uommene se nzorano, pecché vedeno na bella figliola, pensano sempe a essa, e se senteno friccecà la sango dinto a li vene; io, per esempio, non pozzo guardà chella pupa che me sento na cosa intema, no movimento che non saccio ched’è!...

FELICE: D. Angiolì, io ve vaco trovanno pecché v’aggia dicere na cosa.

ANGIOLILLO: Che cosa?

FELICE: Non dicite a zi zio che so’ venuto nzieme co buje a Napole pe ghì a piglià la sposa, dicite che non ne saccio niente, che non la conosco nemmeno, che tutto avite fatto vuje.

ANGIOLILLO: Pecché?

FELICE: Pecché nce aggio pensato meglio, non me voglio trovà mmiezo a no mbruoglio; chillo zi Nicola ha sospettato quacche cosa; ha ditto nfaccia a me: Si Ngiulillo me combinasse quacche mbroglia, io lo squartarrìa, le scepparrìa a capa da dinto a la noce de lo cuollo... a isso e a chi le desse mano!

ANGIOLILLO: Comme! Chesto ha ditto!

FELICE: Chesto ha ditto! Vuje diciveve che zi zio era no scemo, non capiva niente... Addò! Chillo capisce tutte cose.

ANGIOLILLO: A me poco primme, m’ha fatto mettere l’aneme de la paura, pecché ha ditto: Birbantiello, tenive chesto ppoco ncuorpo, te vatte mpietto, guarde ncielo, e pò mme combine chisto servizio... invece de na femmena, m’haje portata na pupatella!

FELICE: Scuse! E allora ha scoverto tutto?

ANGIOLILLO: No, pecché ha ditto: chesta ha da essere la mogliera toja, e pe ciente anne.

FELICE: V’ha cuffiato, v’ha cuffiato... dateme lo cappello. (Gira per la scena.) All’arma di chi v’ha allattato!

ANGIOLILLO: Aspettate.

FELICE: Chillo ha ditto pure che li nespole se songo ammaturate.

ANGIOLILLO: Quà nespole?

FELICE: Comme quà nespole, la paliata che aggia avè.

ANGIOLILLO Ch’aggia fà, io mò me trovo, a chello che n’esce n’esce... anze mò sapite che faccio? Vaco a chiammà a zi zio, nce la presento, e vedimmo che succede... accussi me levo lo pensiero.

FELICE: Sì, ma levateme da miezo a me.

ANGIOLILLO: Va buono, io ve levo da miezo. (Via dal fondo a sinistra.)

FELICE: Chillo tene ccà tutti i coloni dipendente suoje, me la fa na cauciata, addò me la vaco a cagnà?