SCENA TERZA

Nicola con carta in mano, e detti.

NICOLA: D. Asdrù, l’usciere ha portato sta carta de lo patrone de casa, dicenno ca è la terza citazione, e si non ghiate a risponnere manco a chesta, dinto a tre ghiuorne ve manna sequestro e sfratto.

ASDRUBALE: è venuta la provvidenza!

LUCREZIA: Iarrammo miezo a la via!

NICOLA: Oh! Ma vuje nce avite da pensà a st’affare. Vuje comme ntennite ca li gente avanzano li danare lloro, e s’hanno da stà zitte? Chillo poverommo have d’avè no zeffunne de denare, vuje avite da vedè comme avite da fà pe lo pagà... Ve ne state accossì sciolto. Da n’auta parte, caro D. Asdrubale, abbasamme pure sto cunto nuosto. Io so’ duje anne che sto co vuje a servì, e m’avite attrassate no sacco de mesate. Vuje duje anne fA quanno teniveve la scola aperta, me facisteve venì co vuje mentre io steva co no ricco signore, me promettisteve mare e munno, pò, doppo quattro mise, levasteve la scola pecché de guagliune n’erano rummase poche, e li spese erano assaje, d’allora in poi non me avite dato cchiù no centesimo, e io ntanto, non v’aggio lassato, pecché aggio tenuto sempe la speranza ca m’avisseve pavato, mò però non me fido d’aspettà cchiù, perciò facimmo sti cunte ca tengo ntenzione de cagnà patrone.

ASDRUBALE: Nicola mio, tu haje ragione, qui nessuno ti dà torto, ma agge pacienza n’auto poco, haje aspettato tanto tiempo... non dubità pecché li primme denare che faccio saranno li tuoie.

NICOLA: D. Asdrù, vedite ca io aspetto n’autri quatto juorne, doppo si non me pavate, io me regolo a modo mio. (Via.)

ASDRUBALE: Mariù, chesta è n’auta provvidenza...

LUCREZIA: Sto cancaro de patrone de casa che vò, non se sape. Ogne tanto manna na carta, e pò just’ogge ca e...

ASDRUBALE. La nasceta de mammeta e de papeto. La vuò fernì, o no?

LUCREZIA: Schiatta, voglio parlà, te dà ntuppe?

ASDRUBALE. Parla quante vuò tu, puozze perdere la lengua!

LUCREZIA: E tu cannarone!

MARIUCCIA: Mò accomminciate n’auta vota, ma la fernite sì, o nò?