SCENA NONA

D. Asdrubale, Pulcinella, Dorotea, D. Pasqualino, Guardie prima dentro poi fuori, e detti.

DOROTEA (di dentro gridando): Aspettate... Aspettate!

ASDRUBALE (c.s.): Favorite da questa parte.

FELICIELLO: La voce de zi zia!

LUCREZIA: Asdrubale che vene.

DOROTEA: Nepote mio! Lassatemmillo vasà pe l’ultima vota! (Di dentro.)

ASDRUBALE (fuori): Ah! Eccolo ccà: arrestatelo!

GUARDIA: Signor Felice Sciosciammocca, in nome della legge siete in arresto!

FELICIELLO: Ah! Io lo sapeva.

DOROTEA (fuori): Nepote mio caro caro! Feliciello mio, core de zi zia toja!... (L’abbraccia.)

FELICIELLO: Zì, zì, non chiagnite.

ASDRUBALE: Briccone! Dimme na cosa, comme haje tenuto coraggio de fà chello che haje fatto? Comme, io che t’aggio voluto tanto bene. Li denare addò stanno?

LUCREZIA: Ha ditto che nce l’hanno arrubbate...

CARLINO: Egli mente.

PULCINELLA: Egli vasinicola.

ASDRUBALE: Arrubbato! E comme?

FELICIELLO: è venuto n’ommo a la casa mia, m’ha trovato sulo e si non l’avesse dato lo portafoglio, m’avarria sparato.

PULCINELLA: E perché non t’haje fatto sparà?

FELICIELLO: E pò moreva, e chillo sempe se lo pigliava.

ASDRUBALE: Ma dimme na cosa, tu pecché te l’haje pigliato da nuje?

FELICIELLO: Pecché non me credeva che nce stevano li denare dinto.

MARIUCCIA: Se credeva che nce trovava li lettere de D. Carlino dirette a me.

CARLINO: Non è vero, non è vero.

ASDRUBALE: Tu lo faje pe lo commiglià no poco.

PULCINELLA: (D. Ansè, avite portate li seimila lire?).

ANSELMO: (Mò te dongo no punio nfronte! Chella fà l’amore co miezo munno!).

GUARDIA: Signori, io non posso più trattenermi. Voi seguiteci.

FELICIELLO: Eccomi qua.

MARIUCCIA: Fehiciello mio! (Piange.)

DOROTEA: Nepote mio! (Gridando.)

PULCINELLA: Guè, vì che voce che tene sta vecchia!

FELICIELLO: Zi zia mia! (Si abbracciano.) Mariù... (Piange.)

MARIUCCIA (c.s.): Feliciè.

FELICIELLO: Addio! Vaco carcerato innocentemente, e nisciuno m’ajuta! Jammoncenne... (Per partire.)