SCENA PRIMA

Michele, poi Biase.

MICHELE (esce dalla prima a destra, con scopa in mano): E mò accummencia n’ata jurnata! Nun me ne fido proprio cchiù... Na vota me putevo sosere a chest’ora... ma mò nun lo pozzo fà cchiù... tengo sittant’anne, cinche mise e quatte juorne!... Eh!... E a chi lo cconto?... Appena me lagno nu poco, D.^a Rachele, la Superiora, se fà afferrà chello d’è cane... «Mantenete pulito il convento... Alzatevi presto... » Eh! è na parola!... Io ajere mmatina me susette ambressa, ma pò... pe tramente me stevo vestenno me cuccaje nterra!... Ch’aggia fà, quanno nun me fido?... Che songh’io?... (Guarda verso il giardino.) Sta facenno juorno... stutammo la lanterna... (Esegue.) Aissera nce lo ddicette a lo cunfessore: Io non me fido de fà sta vita... comme aggia fà?... «Agge pacienza, Michè — me dicette — Nun te trapazzà... fallo chiano chiano... e nun ghiastemmà!...» Ma comme aggia fà?... Si lo ffaccio chiano, D.^a Rachele allucca... Cielu mio aiutame tu! (Si mette a spazzare con molta calma.) Io pò dico accussì, putarria scupà n’ato... Nonsignore: haje da scupà tu!... Lo ffanno apposta pe me fa jastemmà! (Con proposito.) Ma io nun ghiastemmo, vì... Io moro, ma nun ghiastemmo!... (Continua a spazzare. Si lamenta:) Ah!... Ah!... Comme me fanno male li rine... nun me pozzo adderezzà cchiù! (Prende una sedia e siede in mezzo alla scena.) Apprimma dinto a n’ora me scupavo tutto lo cunvento... Mò no: mò l’aggia fà chiano chiano e senza jastemmà! Làsseme scupà nu poco vicino a la porta de lo maestro... si no chillo pò allucca! (Si alza e prende la sedia.) Sti ssegge, và trova pecché, giorno pe giorno se fanno sempe cchiù pesante... Sarà l’umidità, forse! (Siede di nuovo e stando seduto spazza intorno a sé. Poi si sposta sempre con la sedia dall’altro lato e continua a spazzare seduto.)

BIASE (dalla prima a destra, con giacca e berretto da cuoco): Michè... (Lo vede che scopa seduto e ride.) Uh! Mamma mia!... Tu che stai facenno?

MICHELE: Sto scupanno... nun lo vvide?

BIASE: E ched’è... scupe assettato?

MICHELE: E che vuò da me, quann’io nun me fido?... Lo ccafe ll’haje fatto?...

BIASE: Gnorsì, sta tutto pronto.

MICHELE (alludendo al suo compito): Biase mio... è vita che nun la pozzo fà cchiù.

BIASE (a parte, squadrandolo): Qmmo co la scopa mmano. (Apre un libro che aveva con sé e legge. è la cabala del giuoco del lotto.) Ommo co la scopa mmano... 67...

MICHELE (accortosi della manovra di Biase): Lo vì lloco, lo vì... E chesto fa sempe!...

BIASE (misterioso) Michè... si sta vota faj chello che te dico io, cagnammo pusizione tutte e dduje!... Tengo tre nummere proprio a licchetto!... Cinche lire pedòno a terno sicco, pigliamme cinquantamila franche... facimmo cinquantamila zumpe!...

MICHELE (rettificando): Cioè... zumpe tu... Io comme zompo cchiu?

BIASE: Statte zitto, nun. pazzià... Sabato simme ricche!

MICHELE (incredulo): Bià, vattenne, famme stu piacere... Tu sempe chesto haje ditto e mai nu nummero avimmo pigliato!

BIASE (convinto): Ma mò è certo! (Racconta:) Stanotte, all’una e mezza, io stevo affacciato a lo fenestone de la strada... nun se senteva manco na mosca... quanno tutto nzieme è passato n’ommo a cavallo a nu ciuccio che diceva: «Me parene mill’anne che me mengo dinto a lo lietto!...». Ommo a cavallo a lo ciuccio: 54... e lietto: 5... Doppo na mez’ora è passata ne femmena e ha ditto: «Tenevo 59 solde... n’aggiu spise cinche, so’ rimaste 54. Dunque: 5 lo lietto, 21 la femmena e 54 ommo a cavallo a lo ciuccio!».

MICHELE: Ma comme, uno parla e tu faje li nummere?

BIASE: Se capisce! E accussì se pigliano li tierne... le quaterne... Lo mese passato io comme pigliaje l’ambo? Venette la Superiora dinto a la cucina e me dicette: «Munzù, quanno facite la pummarola, mettitiece nu poco de zucchero si no è aspra ». Io facette: 27 lo zzucchero e 46 la pummarola!

MICHELE: Tu che dice?

BIASE: Eh, che dico!... Me pezzecai vinticinche piezze!... Tu qualunque cosa siente che te facesse nu poco de mbressione, fà e nummere e pò vide si nun piglie lo terno!...

MICHELE (interessato): Overo?

BIASE: Guè, chillo dice: Overo?... (Racconta:) Na vota nu cumpagno mio cuoco ne fuje cacciato da lo padrone sujo pecché nun se truvaje na pusata d’argiento... Lo pover’ommo era innocente: jette addo lo signore pe cuntà le rragione soje e chillu le dicette: «Si viene n’ata vota te piglio a mazzate! Tu sì mariuolo e nun t’aggia fatto j dinto a lo ccarcere, pecché songo nu signore nobbele!». Chillu se nejette... e facette: 38 le mazzate, 44 lo ccarcere, 69 lo signore nobele e 79 lo mariuolo... Quanno fuje lo sabato... ppà... tutte e quatte...: sissantamila piezze!...

MICHELE (stordito dalla cifra): Uh! Mamma mia... Bià, tu mò me fai murì...

BIASE Eh, te faccio murì... Chiste songo fatte, amico mio!

MICHELE (deciso): Va buono, nun te ne ncarricà. Da oggi in poi qualunque cosa sento faccio li nummere!

BIASE: Bravo!... E sti ccinche lire me le vuò dà pe trasì mpurzione?...

MICHELE: Cinche lire?... Bià... pecché nun ce mettimmo ddoje lire pedono?

BIASE (sprezzante): Ddoje lire? E che pigliammo cu ddoje lire? Lo butto o adda essere buono o niente! (Perentorio:) Damme cinche lire, nun me fà jastemmà...!

MICHELE (subito, premuroso): Nonsignore, nun ghiastemmà! (Cava di tasca una calza, la svolge, ne tiro fuori cinque lire e le dà a Biase, rimettendo in tasca la calzo.) Tiene!

BIASE (intasca il danaro): Va buono, mò ce penz’io pe ghiucà lo biglietto. Jammo dinto mò... E gguaglione s’hanna piglià lo ccafè...

MICHELE (mettendosi sotto il braccio a Biase): Bià... che fortuna si pigliasseme lo terno!

BIASE (sicuro): Lo pigliammo, lo pigliammo... nun te ne ncarricà! (Si avviano. Si sentono sette rintocchi d’orologio.) Zitto! (si ferma e conta i rintocchi)... ddoie... tre... quatte... cinche... sei... e sette!... (A Michele:) Ogge quanto n’avimmo?

MICHELE: Dicennove...

BIASE: Sette e dicennove! (Deciso:) Damme na lira!

MICHELE: E pecché?

BIASE: Damme na lira, nun me fà jastemmà...

MICHELE: No, senza jastemmà, pe ammore de lo cielo! (Prendela solita calzo e dà la moneta richiesta.) Tiene!

BIASE: Jammuncenne!

MICHELE (che non ha capito): Ma che vuò fà? Ch’è stato? Ched’è?...

BIASE (contraffacendolo): Che vuò fà?... Ch’è stato? Ched’è... Haje ntiso la campana?... E nun te ne ncarricà!

MICHELE: Aveva sunà la campanella a tiempo pe perdere n’ata lira a mmano a mmano!... (Esce con Biase dalla prima a destra.) (La scena rimane un attimo vuota. Improvvisa mente si sentono abbaiare diversi cani internamente. Ormai è giorno fatto.)