[70] Cena quoque eius secretior in fabulis fuit, quae vulgo dodekatheos vocabatur; in qua deorum dearumque habitu discubuisse convivas et ipsum pro Apolline ornatum non Antoni modo epistulae singulorum nomina amarissime enumerantis ex probrant, sed et sine auctore notissimi versus;

'Cum primum istorum conduxit mensa choragum,
  Sexque deos vidit Mallia sexque deas,
Impia dum Phoebi Caesar mendacia ludit,
  Dum nova divorum cenat adulteria:
Omnia se a terris tunc numina declinarunt,
  Fugit et auratos Iuppiter ipse thronos."

Auxit cenae rumorem summa tunc in civitate penuria ac fames, adclamatumque est postridie: Omne frumentum deos comedisse et Caesarem esse plane Apollinem, sed Tortorem, quo cognomine is deus quadam in parte urbis colebatur. Notatus est et ut pretiosae supellectilis Corinthiorumque praecupidus et aleae indulgens: Nam et proscriptionis tempore ad statuam eius ascriptum est:

"Pater argentarius, ego Corinthiarius,"

cum existimaretur quosdam propter vasa Corinthia inter proscriptos curasse referendos; et deinde bello Siciliensi epigramma vulgatum est:

"Postquam bis classe victus naves perdidit,
Aliquando ut vincat, ludit assidue aleam."