HYMN 124

uSA uchantI samidhAne agnA udyan sUrya urviyA jyotirashret
devo no atra savitA nvarthaM prAsAvId dvipat pra catuSpadityai
aminatI daivyAni vratAni praminatI manuSyA yugAni
IyuSINAmupamA shashvatInAmAyatInAM prathamoSA vyadyaut
eSA divo duhitA pratyadarshi jyotirvasAnA samanA purastAt
Rtasya panthAmanveti sAdhu prajAnatIva na disho minAti
upo adarshi shundhyuvo na vakSo nodhA ivAvirakRta priyANi
admasan na sasato bodhayantI shashvattamAgAt punareyuSINAm
pUrve ardhe rajaso aptyasya gavAM janitryakRta pra ketum
vyu prathate vitaraM varIya obhA pRNantI pitrorupasthA
evedeSA purutamA dRshe kaM nAjAmiM na pari vRNakti jAmim
arepasA tanvA shAshadAnA nArbhAdISate na mahovibhAtI
abhrAteva puMsa eti pratIcI gartArugiva sanaye dhanAnAm
jAyeya patya ushatI suvAsA uSA hasreva ni riNIte apsaH
svasA svasre jyAyasyai yonimAraigapaityasyAH praticakSyeva
vyuchantI rashmibhiH sUryasyAñjyaN^kte samanagA ivavrAH
AsAM pUrvAsAmahasu svasR^INAmaparA pUrvAmabhyeti pashcAt
tAH pratnavan navyasIrnUnamasme revaduchantu sudinA uSAsaH
pra bodhayoSaH pRNato maghonyabudhyamAnAH paNayaH sasantu
revaducha maghavadbhyo maghoni revat stotre sUnRte jArayantI
aveyamashvaid yuvatiH purastAd yuN^kte gavAmaruNAnAmanIkam
vi nUnamuchAdasati pra keturgRhaM\-gRhamupa tiSThAte agniH
ut te vayashcid vasaterapaptan narashca ye pitubhAjo vyuSTau
amA sate vahasi bhUri vAmamuSo devi dAshuSe martyAya
astoDhvaM stomyA brahmaNA me.avIvRdhadhvamushatIruSAsaH
yuSmAkaM devIravasA sanema sahasriNaM ca shatinaM cavAjam